- वि.सं २o८१ पौष २४ बुधबार
बुद्ध जन्मस्थल लुम्बिनीस्थित मायादेवी मन्दिरमा राखिएको दानपेटिकाबाट एक करोड ४३ लाख ५९ हजार ९९० रुपैयाँ संकलन भएको छ। आर्थिक वर्ष २०८१/०८२ मा दोस्रोपटक गणना गरिएको दानपेटिकाबाट उक्त रकम संकलन भएको लुम्बिनी विकास कोषले जनाएको छ।
पुस १८ देखि २३ गतेसम्म पाँच दिन लगाएर दानपेटिकाको पैसा गणना गरिएको कोषका कोषाध्यक्ष ढुण्डिराज भट्टराई (सिद्धिचरण)ले बताए। उनले स्थानीय तह, सुरक्षाकर्मी, प्रहरी र अन्य सरोकारवालाहरूको उपस्थितिमा दानपेटिका खोली गणना गर्ने गरिएको जानकारी दिए।
दानपेटिकामा संकलित दानलाई सिसिटिभी क्यामेराको निगरानीमा कोषका ३२ कर्मचारी खटाएर गणनाको व्यवस्था मिलाइएको थियो। दानबापत संकलित रकमबाट कोषको आन्तरिक खर्च व्यवस्थापन हुँदै आएको छ।
