- वि.सं २o७८ असोज १२ मंगलबार
विभागीय टोली नेपाल पुलिस क्लब छैटौँ एनभिए पुरुष क्लब भलिबल च्याम्पियनसिपको शीर्ष स्थानमा रहेको छ । लिगमा लगातार दोस्रो जित निकालेर पुलिसले शीर्ष स्थान सुरक्षित बनाएको हो । राष्ट्रिय खेलकुद परिषद्को कभर्ड हलमा सोमबार पुलिसले मणिमुकन्द भलिबल क्लबलाई ३–० को सोझो सेटमा पराजित गर्यो । पुलिससामु मणिमुकुन्द तीनवटै सेटमा कमजोर देखिँदा खेल २५–१४, २५–१५ र २५–१७ ले गुमायो । यसअघि पुलिसले पहिलो खेलमा दावाली मिलन क्लबलाई पनि सीधा सेटमा पाखा लगाएको थियो । प्रतियोगिताको पुरुषतर्फको समूह बीमा रहेको पुलिसले दुई खेलमा ६ अंक जोडेको छ । मणिमुकुन्दले हारबाट प्रतियोगिताको सुरुवात गरेको छ ।
गलकोट क्लबको लगातार दोस्रो जित
गल्कोट स्पोर्टस् क्लबले लगातार दोस्रो जित निकालेको छ । लगातार दुई खेलमा जित निकालेको गल्कोट समूह एको शीर्ष स्थानमा छ । गल्कोटले प्रदेश–२ माथि २५–२३, २५–२१ र २५–१८ को जित निकालेको हो । पहिलो खेलमा गल्कोटले बागमती प्रदेशलाई हराएको थियो । प्रतियोगिताको साविक विजेता हेल्प नेपाल र गण्डकी प्रदेशले जित हात पारेका छन् । हेल्प नेपालले बागमती प्रदेशलाई ३–० ले निराश पार्यो । एक पक्षीय खलमा हेल्पले बागमतीमाथि २५–१६, २५–१३ र २५–१२ को सेटमा जित निकालेको हो । अर्को खेलमा गण्डकी प्रदेशले दावाली मिलन क्लबलाई ३–१ को सेटमा पराजित गर्यो । भारतीय खेलाडीसहित कोर्ट उत्रिएको गण्डकीले दावालीमाथि २५–१२, २५–२२, २०–२५ र २७–२५ ले हरायो । दावालीको यो लगातार दोस्रो हार हो ।
पहिलो दुई सेट गुमाएको दावालीले तेस्रो सेटमा पुनरागमन गरेको थियो । यस सेटमा दावालीले गण्डकीलाई २५–२० ले हरायो । यद्यपि चौथो सेटमा पनि दावालीले गण्डकीलाई चुनौती प्रस्तुत गर्यो । अर्को खेलमा नयाँ बजार सामाजिक युवा क्लबले कर्णाली प्रदेशमाथि २५–१८, २५–१९ र २५–२१ को सेटमा हरायो । ढोरपाटन स्पोर्टस् क्लब बुढानीलकण्ठ भलिबल क्लबलाई २५–१९, २५–२३ र २५–१५ को सेटमा पराजित गर्यो ।
नेपाल भलिबल संघको आयोजनामा सञ्चालन भइरहेकोे च्याम्पियनसिपमा पुरुषतर्फ १४ टोली र महिलातर्फ ६ टोलीले सहभागिता जनाइरहेका छन् । छैटौँ एनभिए पुरुष क्लब भलिबल महिला पुरुष विजेताले चार लाख र उपविजेताले दुई लाख पाउनेछन् । तेस्रो स्थानमा रहने टोलीले एक लाख लाख प्राप्त गर्नेछ । सर्वोत्कृष्ट खेलाडीले २५ हजार र विधागततर्फ उत्कृष्ट हुनेले १० हजार रुपैयाँ पाउनेछन् ।
