- वि.सं २o७८ श्रावण ३० शनिबार
जिल्ला प्रहरी कार्यालय लमजुङले जुवा खेल्दै गरेको अवस्थामा नौजना जुवाडेलाई पक्राउ गरेको छ । सुन्दरबजार नगरपालिका–१० कोइरालाफाँट तीर्थ गुरुङको घर भाडामा लिइबसेका सोही ठाउँ बस्ने मिलन गुरुङले हारजितको बाजी राखी जुवा–कौडा खेलाएको अवस्थामा बिहीबार राति १ बजे उनीहरूलाई प्रहरीले पक्राउ गरेको हो ।
जिल्ला प्रहरी कार्यालय लमजुङका प्रहरी प्रमुख डिएसपी कृष्णबहादुर कार्कीका अनुसार हारजितको बाजी राखी जुवा र कौडा खेल्ने खेलाइरहेको सूचनाका आधारमा उनीहरूलाई पक्राउ गरिएको हो । जुवा र कौडा खेल्दै गरेको अवस्थामा लमजुङका आठजना र सिन्धुलीका एक गरी नौजनालाई इलाका प्रहरी कार्यालय, भोटेओडारबाट खटिएको प्रहरी टोलीले पक्राउ गरेको हो ।
उनीहरूको साथबाट नगद ५५ हजार ६ सय ५८ रुपैयाँ र १६ थानकौडासमेत बरामद गरिएको प्रहरीले जनाएको छ । प्रहरीका अनुसार उनीहरूलाई पक्राउ गरी आवश्यक अनुसन्धानको क्रममा जिल्ला प्रशासन कार्यालय लमजुङबाट शुक्रबार म्याद थप अनुमति लिई थप अनुसन्धान भइरहेको छ ।
