महोत्तरीको महोत्तरी गाउँपालिका– ५ हररी गाउँमा १७ घर डुम समुदायको बसोवास छ । सोमध्ये १० परिवारले जनता आवास कार्यक्रमअन्तर्गत दुईकोठे घर पाएका छन् । तर, गत वर्षदेखि बनिरहेको उक्त दुईकोठे घरको छानो अझै छाइएको छैन । घरमाथि पाल राखेर शरीर लुकाएका छन् ती परिवारले ।
सांसद मञ्जु यादवको कोटामा बनिरहेका उक्त घरहरू कहिले पूर्ण हुने र वर्षायाममा ती परिवारले राहत पाउने अझै अन्याेल छ । विगत केही दिनदेखिको निरन्तरको वर्षाका कारण पाल र प्लास्टिकबट पानी चुहिएर भिजिरहेका छन् । घरभित्रको अन्न भिजेका छन् । बिच्छ्याउना सबै भिजेको छ ।
पानी परेको वेला खानासमेत पकाउने ठाउँ नहुँदा कहिले पानी बस्छ र पकाउँला भनेर बस्नुपर्ने स्थानीय निरो मल्लिक (डुम) ले गुनासो गरिन् । भिजेको कपडा लगाउन बाध्य हुँदा बच्चाहरूसमेत बिरामी पर्न थालेको उनी बताउँछिन् । घाम लागेको वेला ठिकै भए पनि पानी परेको वेला निक्कै सास्ती भोग्नुपरेको उनको दुःखेसो छ ।
वृद्धा दुलारी देवीले पाँच पसेरी (२५ किलो) चामल पानीकै कारण कुहिएको दुखेसो पोखिन् । जेनतेन घर बने पनि छानोकै अभावमा अन्न कुहिएपछि गरिब परिवारले कहाँबाट ल्याउने चिन्ताले सताएको उनी बताउँछिन् ।
त्यति मात्र होइन, घर बनाउँदा सिमेन्टको मात्रा कम भएर अहिले घर नै कमजोर रहेको बताउँछिन् । तीन लाख ३६ हजार प्रतिघर बनाउन खर्च पर्ने भए पनि हालसम्म करिब ९ लाख मात्र पैसा आएको निर्माण समितिको अध्यक्ष उपेन्द्र मल्लिकको भनाइ छ । उनी घर बनाउन समयमै पैसासमेत नआउँदा अझै छानो हाल्न नसकिएको बताउँछन् ।