खेलकुद प्रिन्ट संस्करण

च्याम्पियन्स ट्रफीमा भारतका सबै खेल लाहोरमा 

आइसिसी च्याम्पियन्स ट्रफी २०२५ आयोजनाको जिम्मेवारी पाएको पाकिस्तान क्रिकेट बोर्ड (पिसिबी)ले भारतलाई आतिथ्य गर्न कुनै कसर बाँकी नराख्ने योजना तयार गरेको छ । पछिल्लो समय भारतले पाकिस्तान भ्रमण गरेको छैन । प्रतियोगिता अर्काे वर्षको फेब्रुअरी र मार्चमा हुने तालिका छ । यसपटक पिसिबीले भारतलाई कुनै पनि हालतमा पाकिस्तान लैजाने योजना बनाएको छ । पछिल्लोपटक एसिसी एसिया कपमा भारत पाकिस्तान नजाने भएपछि सबै खेल श्रीलंकामा सारिएको थियो । जहाँ भारतले श्रीलंकालाई दश विकेटले हराउँदै उपाधि जितेको थियो । 

यसपटक पाकिस्तानले च्याम्पियन्स ट्रफीको खेल तीन सहरमा गर्ने योजना बनाएको छ । कराँची, लाहोर र रावलपिन्डीमा खेल हुँदा भारतका सबै खेल लाहोरमा हुने बताइएको छ । टिम व्यवस्थापक र सुरक्षा प्रदान गर्न लाहौर राम्रो विकल्प हुने पिसिबीले आइसिसीलाई प्रतिवेदन बुझाएको छ । ‘भारतलाई लाहोरमा सबै खेल खेल्दा उपयुक्त हुनेछ । नजिकको बोर्डर बाधा हुँदा समस्या पर्दैन,’ पिसिबीको एक अधिकारीले भनेका छन् । आइसिसीका महाप्रबन्धक वासिम खानले हालै लाहोरको भ्रमण गरेका छन् । आइसिसी प्रतिनिधि खानले प्रतियोगिता आयोजनाको स्थलगत भ्रमण र सुरक्षाको विषयमा चासो देखाएका छन् । 

१९९६ पछि पाकिस्तानलाई मौका 

सन् १९९६ पछि पाकिस्तानलाई आइसिसी च्याम्पियन्स ट्रफीसहित कुनै पनि प्रतियोगिता आयोजना गर्ने जिम्मवोरी दिइएको छ । सन् १९९६ को एकदिवसीय विश्वकपपछि पाकिस्तानले प्रतियोगिता आयोजना गर्ने जिम्मेवारी पाएको हो । पछिल्लो समय सुरक्षाकै कारण पाकिस्तानमा आइसिसीको प्रतियोगिता हुन सकेका छैनन् । 

पिसिबीका अध्यक्ष मोहसिन नकवीले खेल तालिका आइसिसीलाई पठाएको बताएका छन् । ‘हामीले आइसिसीलाई खेल तालिका पठाएका छौँ । त्यसक्रममा सुरक्षाको विषयमा पनि कुरा भएको थियो । सबै पोजेटिभ भएका छन्,’ उनले भने, ‘लगातार आईसिसीसँग सम्पर्कमा रहेका छौं । उत्कृष्ट प्रतियोगिता गर्नेमा आशावादी छौं ।’

सात टोली सहभागी हुने
पछिल्लोपटक च्याम्पियन्स ट्रफी सन् २०१७ मा इंग्ल्यान्ड र वेल्समा आयोजना भएको थियो । फाइनलमा भारतलाई हराउँदै पाकिस्तान च्याम्प्यिन भएको हो । प्रतियोगितामा आठ टिमले सहभागिता जनाउने बताइएको छ । भारत र पाकिस्तानसँगै इंग्ल्यान्ड, अस्ट्रेलिया, बंगलादेश, न्युजिल्यान्ड र दक्षिण अफ्रिका हुनेछन् । तर, प्रतियोगिताको तालिका सार्वजनिक भएको छैन ।

च्याम्पियन्स ट्रफी विजेता टिम

सन् १९९८ : दक्षिण अफ्रिका
सन् २००० : न्युजिल्यान्ड
सन् २००२ : भारत/श्रीलंका
सन् २००४ : वेष्ट इन्डिज
सन् २००६ : अस्ट्रेलिया
सन् २००९ : अस्ट्रेलिया
सन् २०१३ : भारत
सन् २०१७ : पाकिस्तान