- वि.सं २o७८ असार १७ बिहीबार
जेठ ३१ गते रातिदेखिको भीषण वर्षासँगै मर्स्याङ्दीमा आएको बाढीले नासोँ गाउँपालिकाको कार्यालय बगाएपछि गाउँपालिकाबाट प्रदान गर्ने सेवा प्रभावित भएको छ । बाढीले मनाङको नासोँ गाउँपालिकाको कार्यालयसँगै धारापानी बजार पनि बगाएको छ ।
बाढीले कार्यालय बगाएपछि गाउँपालिकाको कार्यपालिका बैठकले बेंसीसहरमा आपतकालीन कार्यालय सञ्चालन गर्ने निर्णय गरेसँगै बेंसीसहरबाट सेवा प्रवाह सुरु गरिएको नासोँ गाउँपालिकाका अध्यक्ष चन्द्र घलेले बताए ।
गाउँपालिकाले कारोबार गर्ने बैंक बेंसीसहरमा रहेकाले पनि बेंसीसहरमा आपतकालीन कार्यालय सञ्चालन गरिएको अध्यक्ष घलेको भनाइ छ । बाढीले चामे जाने बाटोसमेत बगाएको र विद्युत् अवरुद्ध भएकाले बेंसीसहरबाट कामकाज हुने गरी निर्णय गरिएको गाउँपालिकाले जनाएको छ ।
धारापानीका सबै स्थानीय ओडार गाउँको आमा समूहको भवनमा बसेका छन् । धारापानीमा रहेका गाउँपालिका कार्यालयसहित प्रभु बैंक, प्राइम कमर्सियल बैंक, सीमा प्रहरी चौकी धारापानी, पर्यटकीय होटेलसहित स्थानीयका १० घर मर्स्याङ्दीले बगाएको छ ।
