- वि.सं २o७७ चैत २४ मंगलबार
माओवादी केन्द्रले प्रदेश १ को आर्थिक मामिला तथा योजनामन्त्री टंक आङबुहाङलाई सांसद पदबाट हटाएको छ । उनी केही समयअघि माओवादी केन्द्र परित्याग गर्दै एमाले प्रवेश गरी मन्त्री बनेका थिए । प्रदेश १ सभा संसदीय दलले सोधेको स्पष्टीकरण चित्तबुझ्दो नभएको भन्दै आङ्बुहाङलाई सांसद पदमा नरहने गरी बर्खास्त गरेको माओवादी केन्द्रका नेता इन्द्रबहादुर आङ्बोले बताए ।
सांसद आङ्बुहाङ पार्टी र दलको अनुमतिविना अर्को दलमा गएर मन्त्री बन्नु प्रदेश १ सभा संसदीय दलको विधान, राजनीतिक दलसम्बन्धी ऐनको प्रतिकूल भएकाले कारबाहीका लागि स्पष्टीकरण सोध्न बाध्य भएको आङ्बोले जानकारी गराए । माओवादी केन्द्रले सांसदबाट हटाएपछि आङ्बुहाङ अब ६ महिना मात्र मन्त्री हुन पाउनेछन् ।
ताप्लेजुङ (ख) बाट विजयी प्रदेश सांसद आङ्बुहाङ माओवादी केन्द्र संसदीय दलका नेता थिए । एमाले र माओवादी केन्द्रबीच एकता भएपछि उनी नेकपा संसदीय दलको उपनेता बनेका थिए । माओवादी केन्द्रका अध्यक्ष पुष्पकमल दाहाल प्रचण्डनिकट मानिँदै आएका आङ्बुहाङले प्रदेश १ सरकारमा सिनियरको नाताले आफू मन्त्री हुनुपर्ने आकांक्षा राख्दै आएका थिए । तर, पार्टीभित्रको सन्तुलनले गर्दा उनी मन्त्री हुनबाट वञ्चित भएका थिए । मन्त्री हुन नपाएपछि उनले वेलावेला आफूलाई प्रदेशको वैकल्पिक मुख्यमन्त्रीका रूपमा पनि चर्चामा ल्याउने गरेका थिए ।
पछिल्लो समय मुख्यमन्त्री शेरधन राईविरुद्ध अविश्वासको प्रस्ताव दर्ता गराउँदा आफूलाई मुख्यमन्त्री र दलको नेताका रूपमा प्रस्ताव नगरेको भन्दै उनी रुष्ट हुन पुगेका थिए । उनी २८ फागुनमा एमाले केन्द्रीय सदस्य बनेका थिए । मुख्यमन्त्री राईले आङ्बुहाङलाई १३ चैतमा प्रदेश १ को आर्थिक मामिला तथा योजनामन्त्री नियुक्त गरेका थिए ।
मुख्यमन्त्री राईविरुद्धको अविश्वास प्रस्ताव फिर्ता
प्रदेश १ का मुख्यमन्त्री शेरधन राईविरुद्ध प्रदेश सभामा दर्ता भएको अविश्वासको प्रस्ताव फिर्ता भएको छ । माओवादी केन्द्रले सोमबारको बैठकमा प्रस्ताव फिर्ता लिएको हो ।
तत्कालीन नेकपाबाट हस्ताक्षर गर्ने ३७ सांसदमध्ये एमालेका २२ सांसदले प्रस्ताव फिर्ता लिएसँगै माओवादी केन्द्रले १५ सांसदको हस्तारक्षर फिर्ता लिएको हो ।
माओवादी केन्द्र संसदीय दलका नेता इन्द्रबहादुर आङ्बोले सोमबार दिउँसो २ बजे बसेको प्रदेश सभा बैठकमा मुख्यमन्त्रीविरुद्ध टेबल भएको अविश्वासको प्रस्ताव फिर्ता लिएको जानकारी गराए ।
