युवाको घाँटी रेटी हत्या गर्ने पक्राउ

बाराको निजगढमा एक युवाको हत्या गर्नेलाई प्रहरीले रौतहटको चन्द्रनिगाहपुरबाट पक्राउ गरेको छ । निजगढ नगरपालिका– ९ घर भएका १९ वर्षीय रोहित शर्माको सोमबार राति आफ्नै घरमा घाँटी रेटी हत्या भएको थियो । हत्यामा संलग्न रहेका रौतहटको चन्द्रपुर नगरपालिका– ४ मा पान पसल गरेर बस्ने मक्करे भन्ने ३० वर्षीय अरुणकुमार साहलाई प्रहरीले मंगलबार बिहान पक्राउ गरेको हो । 

मृतक शर्माको हत्या गरेर उनको घरबाट साह मंगलबार बिहान साढे चार बजेको समयमा मोटरसाइकलमा निस्केको सिसिटिभी पुटेजमा देखिएपछि निजगढ प्रहरी बिहानै चन्द्रनिगाहपुर आएको थियो । हत्यामा संलग्न साहलाई उनकै पान पसलबाट पक्राउ गरिएको र उनले हत्या आफैँले गरेको स्वीकार गरेको इलाका प्रहरी कार्यलय निजगढका प्रहरी निरीक्षक विकास थपलियाले जानकारी दिए । 
 
जिल्ला प्रहरी कार्यालय बाराका डिएसपी गौतम मिश्रसहितको टोलीले साहको पसलबाट हत्यामा प्रयोग भएको चक्कु, रगतले लतपतिएको कपडा र मोटरसाइकलसहित साहलाई पक्राउ गरेको हो  । के कारणले हत्या भएको भन्नेबारेमा अनुसन्धान भइरहेको जिल्ला प्रहरी कार्यालय बाराका डिएसपी गौतम मिश्रले जानकारी दिए ।