- वि.सं २o७७ माघ ७ बुधबार
कांग्रेस नेता गगन थापाले भोलि कुनै प्रधानमन्त्रीले शतप्रतिशत सांसद आफ्नै चाहियो भनेर संसद् विघटन गरिदिए के गर्ने भन्ने प्रश्न गरेका छन् । बुधबार काठमाडौंमा आयोजित प्रतिनिधिसभा विघटन र संवैधानिक अन्योल विषयक अन्तरक्रिया कार्यक्रममा थापाले असंवैधानिक कदम सच्चिनुपर्ने बताए ।
उनले नेपाल कम्युनिस्ट पार्टी (नेकपा)ले शासन गर्ने वैधानिकता सकिएको बताएका छन् । नेकपाले निर्वाचनबाट प्राप्त जनादेश गुमाएको उनको भनाइ छ ।
जनादेश गुमाउँदा राजनीतिक निष्ठाको आधारमा जनतासँग क्षमा माग्नुपर्ने भए पनि दुवै पक्षले क्षमा नमागेको उनको भनाइ छ । थापाले सर्वोच्च अदालतमाथि सबैले आशाको नजरले हेरेको भन्दै संविधानअनुरूप सही फैसला गर्ने विश्वास व्यक्त गरे ।
कार्यक्रममा कांग्रेसका नेता रमेश लेखकले संविधान र लोकतन्त्रमा कम विश्वास गर्नेले प्रतिनिधिसभा विघटन गरेको बताए । कम्युनिस्टको अधिनायकवादी र सर्वसत्तावादी चेतनाको कारण प्रतिनिधिसभा विघटन भएको उनको भनाइ छ ।
