मध्यपुर थिमि नगरपालिका पुरस्कृत

भक्तपुरको मध्यपुर थिमि नगरपालिका ‘एसियन टाउनस्केप अवार्ड’बाट पुरस्कृत भएको छ ।

ऐतिहासिक, पुरातात्विक तथा सांस्कृतिक सम्पदा संरक्षण तथा पुनर्निर्माणमा महत्वपूर्ण काम गरेको भन्दै मध्यपुर थिमि नगरपालिका ‘२०२० एसियन टाउनस्केप अवार्ड’बाट पुरस्कृत भएको हो । 

युएन हेबिट्याटको एसिया प्यासिफिक क्षेत्रीय कार्यालयले एक समारोह आयोजना गरी नगरपालिकालाई पुरस्कार प्रदान गरेको हो । 

कार्यक्रममा नगरपालिकाका प्रमुख (मेयर) मदनसुन्दर श्रेष्ठले पुरस्कार पाएसँगै ऐतिहासिक तथा पुरातात्विक महत्वको सम्पदा संरक्षणको काममा अझ बढी जिम्मेवार बनाएको बताए । 

यस्तै, मध्यपुर थिमि नगरपालिकालाई आन्तरिक तथा बाह्य पर्यटकको गन्तव्य बनाउन चाहेकोसमेत मेयर श्रेष्ठले बताए । 

युएन हेबिट्याटको एसिया प्यासिफिक क्षेत्रीय कार्यालयले सहरी क्षेत्रको विकास निर्माणको काम हेरेर प्रत्येक वर्ष उक्त अवार्ड प्रदान गर्ने गरेको छ । 

यस वर्ष दक्षिण कोरियाका चार, चीनका तीन, जापानका दुई, मलेसियाकाे एक, थाइल्यान्डको एक र नेपालको मध्यपुर थिमि नगरपालिका गरी कुल १२ वटा सहरलाई पुरस्कृत गरेको हो । 

मध्यपुर थिमि नगरपालिकाले विगत तीन वर्षदेखि भत्केका मठमन्दिर, पाटी, पौवा, ढुंगेधारा, पोखरी, पार्कको संरक्षण तथा पुनर्निर्माणमा ध्यान दिँदै आएको छ ।