डोटीको बोगटानमा जिप दुर्घटना हुँदा चारको मृत्यु, चार घाइते

डोटीको बोगटान फुड्सिल गाउँपालिका- ७ चबराचौतारामा जिप दुर्घटना हुँदा चारजनाको मृत्यु भएको छ भने चारजना घाइते भएका छन् । दीपालयबाट चबराचौताराका लागि छुटेको म.१च ५५० नम्बरको जिप दुर्घटनामा परेकाे हाे ।

दुर्घटनामा परेर बोगटान फुड्सिल गाउँपालिका– ७ चबराचौताराका वडासचिव (नायबसुब्बा ) वर्ष २८ की मन्जु त्रिपाठी, उनकी सासूआमा (नाम नखुलेको) र ग्रामीण जलस्रोत व्यवस्थापन परियोजनामा कार्यरत केआइसिंह गाउँपालिका- ४ चनेकेसैननिवासी कृषि प्राविधिक हरि भट्टको  घटनास्थलमै मृत्यु भएको जिल्ला प्रहरी कार्यालय डोटीका सूचना अधिकारी प्रहरी नायब उपरीक्षक इन्द्रबहादुर मल्लले जानकारी दिए

मृतक मन्जु त्रिपाठीका तीन वर्षीय छोराकाे उद्धारकाे क्रममा बाटाेमै मृत्यु भएकाे  बोगटान फुड्सिल गाउँपालिकाकी उपाध्यक्ष भगवती बमले बताइन् ।

घाइते हुनेहरूमा ग्लोबल आइएमई बैंकमा कार्यरत सुरक्षागार्ड टीकाराम गिरी, उनकी श्रीमती खिमा गिरी, खत्याडी माध्यमिक विद्यालयका शिक्षक हेमन्त भट्ट र चालक कैलाश बम रहेका छन् । घाइतेहरूलाई दीपायल पठाइएको उद्धारमा खटिएका बोगटान फुड्सिल गाउँपालिकाका अध्यक्ष कमलबहादुर गड्सिलाले जानकारी दिए  ।

घाइतेहरूको स्थानीय, गाउँपालिकाका कर्मचारी र सुरक्षाकर्मी मिलेर उद्धार गरिएको छ ।  दुर्घटना गएराति १ बजेको आसपासमा भएको अनुमान छ । जिप सडकबाट करिब दुई सय मिटर तल खसेको छ । जिपमा आठजना सवार थिए ।