- वि.सं २o७७ कार्तिक १८ मंगलबार
कांग्रेसले आमन्त्रित केन्द्रीय सदस्य तथा सांसद सूर्यबहादुर केसीको निधनमा शोक प्रस्ताव पारित गरेको छ । सभापति शेरबहादुर देउवाको अध्यक्षतामा मंगलबार बसेको आकस्मिक बैठकले नेपालको उद्योग वाणिज्य तथा सामाजिक क्षेत्रमा नेता केसीले उल्लेख्य योगदान पुऱ्याएको भन्दै निधनप्रति दुःख व्यक्त गरेको हो ।
०१४ सालमा कास्कीमा जन्मिएका नेता केसी कांग्रेसबाट समानुपातिकतर्फ प्रतिनिधिसभा सदस्यमा निर्वाचित भएका थिए । केसीको निधनमा शोक प्रस्ताव पारित गर्दै मंगलबार, बुधबार र बिहीबार तीन दिनसम्म पार्टीको केन्द्रीय कार्यालय र सबै जिल्ला कार्यालयहरूमा पार्टीको झण्डा आधा झुकाउने निर्णय पनि कांग्रेसले गरेको छ ।
यस्तै, कात्तिक १९ गते बुधबार पार्टी केन्द्र तथा जिल्लाका सबै कार्यालयहरू बन्द गर्ने र १३औँ दिनसम्म केन्द्रीय कार्यालय र सबै जिल्ला कार्यालयहरूमा शोक पुस्तिका राख्ने प्रस्ताव पारित गरेको मुख्यसचिव कृष्णप्रसाद पौडेलले जानकारी दिए ।
कांग्रेस संसदीय दलका प्रमुख सचेतक बालकृष्ण खाणले मंगलबारै विज्ञप्ति जारी गर्दै सांसद केसीको निधनप्रति दुःख व्यक्त गरेका छन् ।
