- वि.सं २o७७ कार्तिक १० सोमबार
लमजुङका चेपाङ र बोटे समुदायलाई दसैँ मनाउन खाद्यान्न सहयोग गरिएको छ । जिल्लाका १४ घरपरिवार चेपाङ र १६ घरपरिवार बोटे समुदायलाई खाद्यान्न वितरण गरिएको हो ।
जिल्ला प्रशासन कार्यालय लमजुङले बेसीसहर नगरपालिका– ११ चिती बरबोटका १० घर र दोर्दी गाउँपालिका– ९ भीरकुनाका चार घर गरी १४ घरलाई परिवारलाई सहयोग गरेको हो ।
दसैँ मनाउन उनीहरूलाई सहयोग होस् भनी प्रतिपरिवार १५ किलो चामल, दुई किलो दाल, एक–एक पोका नुन र सोयाबिन, एक लिटर तेल र एक पोका कुकिज सहयोग गरिएको हो ।
यस्तै, मध्यनेपाल नगरपालिका– ४ दुईपिप्ले बजारनजिकैको बोटेगाउँका बोटलाई पनि खाद्यान्न वितरण गरिएको छ ।
बोटे बस्तीमै पुगेर १६ घरपरिवारलाई लमजुङ उद्योग वाणिज्य संघको सहयोगमा जिल्ला प्रशासन कार्यालय लमजुङले दसैँको राहतस्वरूप खाद्य सामग्री वितरण गरेको हो ।
प्रतिपरिवार १५ किलो चामल, दुई किलो दाल, एक लिटर तोरीको तेल, एक–एक पोका नुन र एक पोका सोयाबिन वितरण गरिएको प्रमुख जिल्ला अधिकारी कृष्णप्रसाद शर्माले बताए ।
उनले कोरोनाका कारण ज्यालादारी गरी दैनिकी गुजारेका चेपाङ र बोटे परिवारको रोजगारी गुमेको अवस्थामा नेपालीको महान् चाड दसैँ मनाउन केही राहत होस् भनेर सहयोग गरेको बताए ।
