मुख्य समाचारफ्रन्ट पेजसमाचारदृष्टिकोणअर्थअन्तर्वार्ताखेलकुदविश्व१७औँ वार्षिकोत्सव विशेषांकफिचरप्रदेशपालिका अपडेट
  • वि.सं २o७७ असोज २४ शनिबार
  • Wednesday, 18 December, 2024
नयाँ पत्रिका काठमाडौं
२o७७ असोज २४ शनिबार o५:१७:oo
Read Time : > 1 मिनेट
मुख्य समाचार प्रिन्ट संस्करण

पौड्याल परराष्ट्रसचिव सहकर्मीहरूलाई निर्देशन– राष्ट्रिय स्वार्थमा खरो उत्रिनूस् 

Read Time : > 1 मिनेट
नयाँ पत्रिका, काठमाडौं
नयाँ पत्रिका
२o७७ असोज २४ शनिबार o५:१७:oo

नवनियुक्त परराष्ट्रसचिव भरतराज पौड्यालले शुक्रबार कार्यभार सम्हालेका छन् । मन्त्रिपरिषद् बैठकले उनलाई बिहीबार मुलुकको २४औँ परराष्ट्रसचिव नियुक्त गरेको हो । पौड्याल आगामी चार वर्ष परराष्ट्रसचिव रहनेछन् । यसअघि परराष्ट्रसचिव रहेका शंकरदास बैरागी मुख्यसचिवमा बढुवा भएपछि पौड्याल वरीयताका आधारमा सचिवमा बढुवा भएका हुन् ।

‘मैले कार्यभार सम्हालेको छु,’ परराष्ट्रसचिव पौड्यालले नयाँ पत्रिकासँग भने । कार्यभार सम्हालेपछि परराष्ट्रका कर्मचारीलाई सम्बोधन गर्दै पौड्यालले जनताको आवाज सम्बोधन गर्दै राष्ट्रिय स्वार्थ पूरा गर्न मन्त्रालय खरो उत्रिनुपर्ने बताए । उनले परराष्ट्रका कर्मचारीहरूलाई यसका लागि तयार हुनसमेत निर्देशन दिए । 

परराष्ट्र मन्त्रालयप्रति पछिल्लोपटक सरकारको विश्वास बढेको भन्दै यो विश्वास कायम राख्न आफूले सक्दो प्रयास गर्ने उनको भनाइ थियो । ‘परराष्ट्र मन्त्रालयबाट यसपटक मुख्यसचिव बन्ने अवसर प्राप्त भयो, प्रधानमन्त्री र परराष्ट्रमन्त्रीको तहबाट मन्त्रालयप्रति देखाइएको विश्वासले हाम्रो आत्मविश्वास बढेको छ, यसलाई कायम गर्न हामी खरो उत्रिनुपर्छ,’ सचिव पौड्यालको भनाइ उद्धृत गर्दै परराष्ट्रका एक सहसचिवले नयाँ पत्रिकासँग भने । सम्बोधनका क्रममा परराष्ट्रसचिव पौड्याल आफू विद्यालय नभएको स्याङ्जाको चिलाउनेबास गाउँबाट आएर परराष्ट्रसचिव बन्ने अवसर पाएको भन्दै भावुक भएका थिए । 

सचिव हुनुअघि पौड्याल परराष्ट्र मन्त्रालयका वरिष्ठ सहसचिव एवं प्रवक्ता थिए । उनले संयुक्त राष्ट्रसंघ र अन्तर्राष्ट्रिय संघसंस्थासम्बन्धी महाशाखाको नेतृत्व गर्दै आएका थिए । त्यसअघि परराष्ट्रसचिव पौड्याल सन् २०१२ देखि २०१६ सम्म पाकिस्तानका लागि नेपाली राजदूत थिए । पाकिस्तान जानुअघि पौड्याल परराष्ट्र मन्त्रालयको दक्षिण एसिया तथा सार्क महाशाखा प्रमुख थिए । यो महाशाखामा नेपाल–भारत सम्बन्धका काम प्राथमिकतामा हुने गरेको छ । उनीसँग दक्षिण एसिया महाशाखाको प्रमुख र सेकेन्ड म्यान दुवैको अनुभव छ । 
पौड्यालले उत्तरपूर्वी तथा दक्षिणपूर्वी एसिया महाशाखामा पनि उपसचिव हुँदा काम गरेका छन् । यसमा विशेषतः चीन र जापान मामिला पर्छ । उनीसँग जेनेभास्थित संयुक्त राष्ट्रसंघका लागि नेपाली स्थायी नियोगका उपनियोग प्रमुखका रूपमा काम गरेको अनुभव छ । उनले युरोप–अमेरिका डिभिजनमा पनि काम गरिसकेका छन् भने उपशिष्टाचार महापालदेखि राहदानी विभागको महानिर्देशकको समेत जिम्मेवारी निर्वाह गरिसकेका छन् । 

भारतसँग वार्ता के हुन्छ ? 
जानकारहरूका अनुसार परराष्ट्रसचिव पौड्यालको परीक्षा भारतीय समकक्षी हर्षवद्र्धन सृंगलासँग हुने आगामी वार्ताबाट सुरु हुनेछ । कालापानी, लिपुलेक, लिम्पियाधुराका विषयमा दुवै देशका परराष्ट्रसचिवस्तरीय वार्ताका लागि दुई पक्षबीच छलफल भए पनि मिति तय भएको छैन । कोरोना महामारी सकिएपछि वार्ता गर्ने भारतको अडान छ । नेपालले भने तत्कालै वार्ता सुरु गर्नुपर्नेमा जोड दिँदै आएको छ । ‘भारतसँग वार्ताका लागि कूटनीतिक पहलकदमी कसरी लिनुहुन्छ, पौड्यालको परीक्षा त्यहीँबाट सुरु हुन्छ,’ एकजना पूर्वराजदूतले नयाँ पत्रिकासँग भने । 

दुई राजदूतको एग्रिमो आयो
सरकारले पाकिस्तान, जर्मनी र बेल्जियमका लागि सिफारिस गरेका तीन राजदूतमध्ये दुईजनाको एग्रिमो आएको छ । पाकिस्तान र जर्मनीका लागि सिफारिस क्रमशः तापस अधिकारी र रामकाजी खड्काको एग्रिमो आएको छ । अब चाँडै राष्ट्रपतिबाट नियुक्ति र शपथको तयारी हुने परराष्ट्र स्रोतले बतायो । बेल्जियमका लागि राजदूत सिफारिस प्रमुख शिष्टाचार महापाल गेहेन्द्र राजभण्डारीको एग्रिमो भने आउन बाँकी छ ।