- वि.सं २o७७ असोज १३ मंगलबार
धरानस्थित बिपी कोइराला स्वास्थ्य विज्ञान प्रतिष्ठानमा कोरोना संक्रमित एक महिलाको मृत्यु भएको छ । मोरङको सुनबर्सी नगरपालिका– ७ की ६८ वर्षीया महिलाको भेन्टिलेटरमा राखेर उपचारको क्रममा मंगलबार बिहान मृत्यु भएको प्रतिष्ठानका प्रवक्ता डा. निदेश सापकोटाले जानकारी दिए ।
ज्वरो, खोकी, श्वासप्रश्वासमा समस्या भएपछि विराटनगरको नोबल मेडिकल कलेजले असोज १० गते प्रतिष्ठानमा रेफर गरेको थियो । मिर्गाेला रोगी ती महिलाको नियमित डाइलाइसिस भइरहेको थियो ।
उनलाई असोज ५ गते कोरोना संक्रमण पुष्टि भएको थियो । योसँगै प्रतिष्ठानमा कोरोना संक्रमणका कारण मृत्यु हुनेको संख्या ३६ पुगेको छ । सोमबार पनि धरान– २ की ३८ वर्षीया एक महिलाको प्रतिष्ठानमा मृत्यु भएको थियो ।
