- वि.सं २o८१ बैशाख ३१ सोमबार
भारतले सिन्धुपाल्चोकसहित पाँच जिल्लाका बाढीपीडित स्थानीयहरूका लागि टेन्ट र त्रिपालसहितका राहत सामग्री उपलब्ध गराएको छ ।
भारतीय सहयोगको एक सय ७० टेन्ट तथा करिब तीन सय त्रिपाल सिन्धुपाल्चोक जुगल र भोटेकोसी गाउँपालिका तथा बाह्रबिसे नगरपालिका पठाइएको छ ।
भारतीय राजदूतावासले नेपाल–भारत महिला मैत्री समाजका अध्यक्ष तथा सांसद चन्दा चौधरीमार्फत आपतकालीन राहत सामग्री पठाएको हो ।
भारतीय दूतावासका उपनियोग प्रमुख नाम्ग्य सी. खम्पाले सांसद चौधरीलाई आज राहत सामग्री हस्तान्तरण गरेकी हुन् ।
सिन्धुपाल्चोक, महोत्तरी, सर्लाही, नवलपरासी र कैलालीका स्थानीय गाउँपालिका एवं नगरपालिकासँग समन्वय गरेर सामग्री हस्तान्तरण गर्न लागिएको सांसद चौधरीले जानकारी दिएकी छिन् ।
त्रिपाल हस्तान्तरणका लागि चौधरीसहितको टोली आज अपराह्न सिन्धुपाल्चोकतर्फ लागेको छ ।
भारत सरकारको नियमित मानवीय सहयोग तथा आपतकालीन राहत सहायताअन्तर्गत उक्त राहत सामग्री नेपाललाई वितरण गरिएको भारतीय दूतावासका प्रवक्ता अभिषेक दुबेले बताए ।
करिब दुई करोड रुपैयाँबराबरका पाँच सय थान अस्थायी टेन्ट तथा आठ सय थान प्लास्टिक सिट (त्रिपाल) भारतले दिएको हो ।
यीमध्ये सिन्धुपाल्चोकका लागि एक सय ७० टेन्ट र तीन सय त्रिपाल दिन लागिएको चौधरीले बताइन् । नेपाल सरकारको स्वीकृतिमा भारतीय दूतावासले सामग्री दिएको हो ।
