- वि.सं २o७७ भदौ २६ शुक्रबार
कोरोना संक्रमण भएपछि होम आइसोलेसनमा बसिरहेका प्रदेश १ का सामाजिक विकासमन्त्री जीवन घिमिरे दुई साता बित्दा पनि संक्रमणमुक्त हुन सकेका छैनन् ।
आइसोलेसनमा बसेको १४ दिनपछि जनस्वास्थ्य प्रयोगशालमा पिसिआर परीक्षण गर्दा पनि उनमा कोरोना पोजेटिभ देखिएको छ ।
बुढीगंगा १ स्थित आफ्नै निवासमा आइसोलेसनमा बसिरहेका ५९ वर्षीय मन्त्री घिमिरेले पूर्ण संक्रमणमुक्त नभएसम्म आफू होम आइसोलेसनमै बसिरहने जानकारी दिए ।
१३ भदौमा पिसिआर परीक्षण गराउन स्वाब संकलन गराएपछि मन्त्री घिमिरे होम आइसोलेसनमा बसेका हुन् । त्यसको दुई दिनमा घिमिरेलाई कोरोना संक्रमण पुष्टि भएको थियो ।
मन्त्री घिमिरेको निजी सचिवालयका अनुसार स्वास्थ्य अवस्था सामान्य हुँदै गएको र कोरोनाका लक्षणहरू हराउँदै गएकाले उनको चौध दिनपछि बिहीबार पुनः पिसिआर परीक्षण गरिएको थियो ।
