- वि.सं २o७७ भदौ १६ मंगलबार
काठमाडौं उपत्यकामा मोडालिटी परिवर्तन गरी निषेधाज्ञा थप हुने भएको छ । गृह मन्त्रालयको सहमतिमा निषेधाज्ञा थप गर्ने उपत्यकाका तीन जिल्लाका प्रमुख जिल्ला अधिकारीको तयारी छ ।
काठमाडौं, ललितपुर र भक्तपुरका प्रमुख जिल्ला अधिकारीले यसबारे मंगलबार छलफल गरेका छन् । छलफलमा निषेधाज्ञा थप्नुको विकल्प नभएको निष्कर्ष निकालिएको छ । निषेधाज्ञा थपबारे बुधबार निर्णय गरिने काठमाडौंका प्रमुख जिल्ला अधिकारी जनकराज दाहालले बताए ।
गृह मन्त्रालय स्रोतका अनुसार केही क्षेत्रलाई खुकुलो बनाउनुपर्ने राय आएको छ । सोहीअनुसार स्वास्थ्य मापदण्ड पालना गर्ने गरी केही आर्थिक क्षेत्रलाई सञ्चालन गर्न दिनेबारे बुधबार निर्णय गर्न लागिएको छ ।
उपत्यकामा ३ भदौदेखि निषेधाज्ञा लागू गरिएको हो । १० भदौमा एक साताका लागि थप गरिएको थियो । निषेधाज्ञाको १३ दिन भइसके पनि उपत्यकामा संक्रमण झन् बढिरहेको छ । तर, यसले संक्रमणको बढ्दो दरलाई धेरै हदसम्म नियन्त्रण गरेको स्वास्थ्य मन्त्रालयले जनाएको छ ।
