मकवानपुरको उत्तरी क्षेत्र थाहा नगरमा पहिरोले पुरिँदा एकजनाको मृत्यु भएको छ । जिल्लाको उत्तरी क्षेत्र थाहा नगरपालिका– १२ स्थित गैरीगाउँमा रहेको ढुंगाखानीमा बिहीबार साँझ ७ बजे पहिरोले पुरिँदा एकजनाको मृत्यु भएको जिल्ला प्रहरी कार्यालय मकवानपुरले जनाएको छ ।
प्रहरीका अनुसार पहिरोमा परी स्थानीय ५४ वर्षीय कालु मोक्तानको मृत्यु भएको छ । मुक्तानको शव शुक्रबार बिहान पुरिएको अवस्थामा फेला परेको जिल्ला प्रहरी प्रवक्ता डिएसपी इन्द्रबहादुर रानाले जानकारी दिए ।
मोक्तान ढुंगा उत्खननकाे जिम्मा पाएको माइनिङ एन्ड माइनिङ कम्पनी प्रालि काठमाडौंको कर्मचारी हुन् ।
पहिरोमा परी एक एक्स्काभेटर र तीनवटा टिपर पुरिएको थियो । ‘पहिरो पन्छाउने काम भइरहेको छ, हालसम्म एक एक्स्काभेटर र तीनवटा टिपर भेटिएको छ,’ डिएसपी रानाले भने । टिपर र एक्स्काभेटर नदेखिने गरी पुरिएकोले क्षतिको विवरण आउन बाँकी रहेको प्रहरीको दाबी छ ।
पहिरोपछि स्थानीय र इलाका प्रहरी कार्यालय पालुङका प्रतिनिधिहरू बिहीबार राति नै घटनास्थल पुगेका थिए । राति भएका कारण उद्धार गर्न निकै समस्या भएकोले शुक्रबार बिहानैबाट सुरक्षाकर्मी खटेको इलाका प्रहरी कार्यालय पालुङका प्रहरी निरीक्षक विकास तामाङले बताए ।