राष्ट्रिय गौरवको आयोजनाको रुपमा रहेको खाँदबारी–किमाथांका सडकखण्ड अन्तर्गत पहिलो पटक ट्याक्टर किमाथांका पुगेको छ। शनिबार दिउँसो खाँदबारी–किमाथांका सडकखण्ड अन्तर्गत गुडेर किमाथांका गाउँसम्म पहिलो पटक ट्याक्टर गाउँ पुगेको हो ।
नेपालको तर्फबाट च्याम्ताङ गाउँ देखि गुडेर नै पहिलो पटक किमाथांका गाउँसम्म ट्याक्टर पुगेको भोटखोला गाउँपालिका वडा नम्बर १ किमाथांकाका वडाध्यक्ष नुर्वु च्यावाले जानकारी दिए । उनको अनुसार, सडकको स्तरोन्नती गर्दै स्काइभेटरले बाटोको ढुङगा पन्छाउर्दै ट्याक्टर किमाथांका गाउँसम्म पुगेको हो । खाँदबारी–किमाथांका सडकको १६२ किमि सडक पार गर्दै किमाथांका गाउँ सम्म पहिलो पटक ट्याक्टर पुगेको हो । पहिलो पटक किमाथांका गाउँसम्म ट्याक्टर पुगेपछि गाउँलेहरु खुशीले दंग परेको वडाध्यक्ष च्यावाको भनाइ छ ।
किमाथांका संखुवासभाको दुर्गम र चीनसँग सिमाना जोडिएको गाउँ हो । सदरमुकाम खाँदबारी देखि १६२ किमि दुरीमा रहेको किमाथांका गाउँ यातायातको साधान नजोडिदाँ आउनजान १० दिनसम्म लाग्ने गरेको थियो । उत्तरदक्षिण कोशी सडक आयोजनाले ट्रयाक ओपन गरेर किमाथांका गाउँसम्म सडक सञ्जाल जोडेको हो । भोटखोलाको च्याम्ताङ देखि घोङघोप्पा सम्मको १०.८१ किमि कडा चट्टान भएको क्षेत्र नेपाली सेनाले ट्रयाक ओपन गरेर सडक कार्यालयलाई औपचारिक रुपमा हस्तान्तरण गरिसकेको छ ।
अब घोङघोप्पा देखि किमाथांका सम्मको १२ किमि सडकको स्तरोन्नती गरि जेठ दोस्रो साताभित्र नियमित रुपमा सवारी साधान किमाथांका गाउँसम्म पुर्याइने उत्तरदक्षिण कोशी सडक आयोजना प्रमुख रामबहादुर गुरुङले बताए । उनको अनुसार, खाँदबारी–किमाथांका सडकको काम तीव्र गति अघि बढेको छ ।
अहिले भर्खरै यही आर्थिक वर्षभित्र सक्ने गरि ४ अर्ब २ करोड रुपैयाँको अर्थ मन्त्रालयबाट बजेट प्राप्त भएको छ । घोङघोप्पा–किमाथांका सम्मको १२ किमि सडक स्तरोन्नतीको लागि एक अर्ब ५९ करोड १३ लाख ३० हजार रुपैया प्राप्त भएको छ । त्यसैगरि बहुबर्षिय योजना अनुरुपमा फ्याक्सिन्दा दोभानदेखि बरुणसम्म २७.५ किमि सडक कालोपत्रे गर्न २ अर्ब ४३ करोड रुपैया ४ लाख ८३ हजार रुपैया बजेट प्राप्त भएको कार्यालय प्रमुख गुरुङले जनाएको छ ।
पछिल्लो समयमा राष्ट्रिय गौरवको खाँदबारी–किमाथांका सडक आयोजनाले छलाङ मार्दै अघि बढेको छ । त्रिदेशीय लिंक भारत–नेपाल–चीन जोडने सबैभन्दा छोटो ३९० किमि र मानववस्ती भएको बाह्रै महिना चल्न सक्ने कोशी राजमार्ग हो। ०६५ सालमा खाँदबारीमा उत्तरदक्षिण कोशी सडक आयोजनाको कार्यालय स्थापना भई सडक निर्माणको काम थालेको हो ।
किमाथांका–जोगवनी सडकखण्ड सञ्चालन भएपछि कोशी प्रदेशका संखुवासभा, धनकुटा, तेह्रथुम, सुनसुरी, मोरङ, झापा र भोजपुरवासी प्रत्यक्ष लाभान्वित हुनेछन् । सिधा यातायातको रुपमा जोगमुनी देखि किमाथांका सम्म सडक जोडिएपछि धेरै लाभ लिन सकिने स्थानीयको भनाइ छ ।