इतिहासमा आज

सन् १९४८ : अमेरिकी राष्ट्रपति ह्यारी ट्रुम्यानले वैदेशिक सहायता विधेयक (वा अर्को नाम ‘आर्थिक सहकार्य विधेयक’)मा हस्ताक्षर गरेसँगै ‘मार्शल योजना’ कार्यान्वयनमा गयो । दोस्रो विश्वयुद्धमा ध्वस्त भएको युरोपको आर्थिक पुनरुत्थानका लागि ल्याइएको योजनाअन्तर्गत १६ युरोपेली देशले १३.३ अर्ब डलर सहयोग पाए ।

सन् १७२१ : रोबर्ट वालपोल बेलायत र विश्वकै पहिलो प्रधानमन्त्री बने । सुरुमा प्रधानमन्त्री पदावलीलाई अपमानजनक मानिएकाले उनलाई औपचारिक रूपमा ‘फस्ट लर्ड अफ द ट्रेजरी’ भनेर सम्बोधन गरिन्थ्यो । 

सन् १७७६ : हार्बर्ड कलेज (हाल हार्बर्ड विश्वविद्यालय)ले जर्ज वासिंटनलाई ‘देशको हितमा उल्लेखनीय सेवा गरेको’मा सम्मानार्थ डक्टर अफ ल(एलएलडी) डिग्री प्रदान गर्‍यो । 

सन् १९२२ : जोसेफ स्टालिन सोभियत कम्युनिस्ट पार्टीको महासचिव चुनिए । सोभियत संघको सबैभन्दा शक्तिशाली यस पदमा उनी तीस वर्षसम्म कायम रहे । 

सन् १९४९ : इजरायल र जोर्डनले युद्धविराम सम्झौतामा हस्ताक्षर गरेसँगै सन् १९४८ मा सुरु भएको अरब–इजरायल युद्ध औपचारिक रूपमा अन्त्य भयो । 

सन् १९६६ : सोभयित संघले मार्च ३१ मा प्रक्षेपण गरेको ‘लुना १०’ चन्द्रमाको कक्षमा प्रवेश गर्‍यो, जुन पृथ्वीबाहिरको कुनै पनि आकाशीय पिण्डको पहिलो मानव निर्मित भूउपग्रह बन्यो । 

सन् १९७२ : २१ वर्षअघि अमेरिकाले देश प्रवेशमा रोक लगाएपछि युरोप बस्दै आएका चार्ली च्याप्लिन विशेष ओस्कार अवार्ड लिन अमेरिका पुगे । लगत्तै उनी पुनः स्विट्जरल्यान्ड फर्किएका थिए । 

सन् १९७३ : विश्वको पहिलो मोबाइल फोन कल सम्पन्न भयो । मोटोरोला कम्पनीका कर्मचारी मार्टिन कुपरले न्युयोर्क सहरको म्यानह्याटनबाट सोही सहरको न्युजर्सीमा सहकर्मी जोयल एन्गेललाई फोन गरेका थिए । 

सन् १९८८ : सोमालिया र इथोपियाले ‘ओगाडेन क्षेत्र’का लागि दुई देशबिच एक दशकदेखि चलिरहेको युद्ध रोक्ने सम्झौतामा हस्ताक्षर गरे । 

सन् १९९१ : खाडी युद्धपछि संयुक्त राष्ट्र संघको सुरक्षा परिषद्ले पारित गरेको ‘रिजोलुसन ६८७’सँगै इराक र कुवेतबिच औपचारिक रूपमा युद्धविराम भयो । 

सन् २०२२ : तालिबान सरकारले देशमा विगतमा व्यापक रूपमा हुने गरेको अफिम खेतीमाथि प्रतिबन्ध लागायो ।