बागमती प्रदेश सभा : सत्तापक्ष र प्रतिपक्षबिच लफडा, ११ घण्टाको छलफल निष्कर्षविहीन

बागमती प्रदेश सभा सञ्चालनको उद्देश्यअनुसार मंगलबार आह्वान भएको सर्वदलीय बैठक निष्कर्षविहीन बनेको छ । मंगलबार  बिहान ९ बजेदेखि साँझ ७ बजेसम्म चलेको छलफलले कुनै निष्कर्ष निकाल्न नसकेको हो । प्रदेश सभा सञ्चालनका लागि दलहरूबिचको सहमति जुटाउन सभामुख भुवनकुमार पाठकको नेतृत्वमा बसेको बैठकले ठोस निचोड दिन नसक्दा मंगलबारको प्रदेश सभा बैठकसमते बस्न सकेन । ११ घण्टा लामो छलफलमा दलहरू विशेषगरी बजेट बाँडफाँटको विषयमा केन्द्रित भएका थिए ।

सर्वदलीय बैठकमा विगतको सहमतिअनुसारको बजेट उपलब्ध गराउने विषयमा सरकार र प्रतिपक्ष दलहरूबिच छलफल भए पनि निचोड आउन नसकेको हो । बजेटमा भएका असन्तुलन मिलाउने गरी बोलाइएको सर्वदलीय बैठक दुई चरणमा चले पनि निष्कर्ष निस्कन नसकेको हो ।आगामी आर्थिक वर्षको बजेट निर्माणको चरणमा प्रवेश गर्दै गर्दासमेत दलहरूबिच चालू आर्थिक वर्षको बजेट लेनदेनमै केन्द्रित भएका छन् । जसका कारण मंगलबारको प्रदेश सभा बैठक नै प्रभावित भयो । सरकारले प्रतिबद्धता गरेअनुसार बजेट कार्यक्रम उपलब्ध नगराएको प्रतिपक्षले आरोप लगाएको छ भने सरकारले बजेट आफूहरूले नबनाएकाले व्यवस्थापनमा कठिनाइ भइरहेको बताउँदै आएको छ । 

संसदबाट भाग्न खोज्दै छ सरकार : ढकाल 
प्रमुख प्रतिपक्ष दल माओवादी केन्द्र बागमती प्रदेशका प्रमुख सचेतक रत्नप्रसाद ढकालले सरकार संसद् चलाउन इच्छुक नरहेको आरोप लगाए । मंगलबार बसेको सर्वदलीय बैठक र कार्यव्यवस्था परामर्श समितिको बैठकमा सरकारले सहमति जुटाउनेभन्दा पनि प्रतिपक्षलाई चिढ्याएर संसद् बैठक धकेल्नेतर्फ अग्रसर भएको उनको भनाइ छ ।

सरकारले प्रतिबद्धताअनुसार काम नगरेर संसद् र सांसदहरूलाई ढाँट्ने काम गरेको उनले दाबी गरे । ‘सरकारले विगतमा गरेको बजेट वितरणको सहमतिलाई कार्यान्वयन नगरेर पुनः छल्न खोजेको छ,’ उनले भने, ‘सरकारले प्रतिबद्धताअनुसार कुनै पनि काम अघि बढाएको अवस्था नदेखिएकाले हामी सरकारसँग सहमत हुने अवस्था भएन ।’ 

सकारले गरेको प्रतिबद्धताअनुसार तत्काल प्रक्रिया अघि बढाएर सहमतिअनुसार बजेट वितरण गर्नुपर्ने उनको भनाइ छ । उनले सरकारले सहमति कार्यान्वयन नगरेर प्रतिपक्षलाई संसद् अधिवेशनको अन्त्य गर्ने चेतावनीपूर्ण भाषामा धम्क्याएको पनि दाबी गरे । सरकार गम्भीर नबने बुधबारको प्रदेश सभा बैठक पनि सञ्चालन हुन नसक्ने उनको भनाइ छ ।

संसद् चल्न नसके अधिवेशन अन्त्य गर्छौँ : मुख्यमन्त्री लामा
यता प्रदेशका मुख्यमन्त्री बहादुरसिंह लामाले प्रतिपक्ष दललाई मिलाउने प्रयत्न भइरहेको उल्लेख गर्दै विगतका सहमति क्रमशः कार्यान्वयनको चरणमा रहेको र केही दिनमा सबै विषयहरू मिलाएर जाने दाबी गरे । विगतमा आफैँले बनाएको बजेटमा असन्तुष्टि राख्दै पुनः थप बजेट माग गर्नु उचित नरहेको उनले गुनासो गरे। 

सरकारले संसद् सञ्चालन तथा कानुन निर्माणको काम अघि बढाउन लचकता अपनाए पनि प्रतिपक्ष दलले सहयोग नगरेको उनको भनाइ छ । विगतको सहमतिअनुसार प्रतिपक्ष दल र सत्तापक्षका सांसदहरूको छुटेका आयोजनाको बजेट एक अर्ब २० करोड रुपैयाँको रहेको र त्यसमध्ये ८० करोड रुपैयाँको बजेट व्यवस्थापन गर्न बाँकी रहेकाले सो कामलाई अगाडि बढाइसकिएको मुख्यमन्त्री लामाले बताए ।

उनले विषय नबुझी बैठक सञ्चालनमा अड्को थापेर प्रतिपक्षले सरकारलाई अप्ठ्यारो पार्न खोजेको दाबी गरे । उनका अनुसार बुधबारको अवस्थाअनुसार प्रदेश सभा अधिवेशन अन्त्य गर्ने रणनीति रहेको छ । बुधबार सामान्य ढंगबाट बैठक चलेमा संसद्का कार्यसूची अघि बढाउने र संसद् बैठक चल्न नसकेको खण्डमा प्रदेश सभा अधिवेशन अन्त्य गर्नेतर्फ अघि बढ्ने उनले स्पष्ट पारे ।