- वि.सं २o८१ चैत २० बुधबार
लागत अनुमानभन्दा एक करोड ३९ लाख डलर कम देखियो न्यूनतम वित्तीय प्रस्ताव
मिलिनियम च्यालन्ज कर्पाेरेसन (एमसिसी) अनुदानमा बन्ने बाँकी दुई सय ९७ किलोमिटर लामो तीन प्रसारणलाइन बनाउन नौ कम्पनीले प्रस्ताव पेस गरेका छन् । मिलिनियम च्यालेन्ज एकाउन्ट नेपाल विकास समिति (एमसिए–नेपाल)ले प्रसारणलाइनलाई तीन लटमा विभाजन गरेर १२ मंसिरदेखि ७ फागुनसम्म ग्लोबल टेन्डर आह्वान गरेको थियो । त्यसमा नेपाल, भारत, चीन र टर्कीका नौ कम्पनीले प्रस्ताव पेस गरेका छन् ।
एक सय १७ किमि लामो लप्सीफेदी–रातमाटे–न्यु हेटौँडालाई लट–१, ९० किमि लामो रातमाटे–न्यु दमौलीलाई लट–२ र ९० किमि लामो न्यु दमौली–न्यु बुटवललाई लट–३ मा राखेर ग्लोबल टेन्डर आह्वान गरिएको थियो । त्यसमा दुई कम्पनीले तीनवटै लटमा र दुई कम्पनीले दुई–दुईवटा लटमा र बाँकी पाँच कम्पनीले एक–एक प्रस्ताव पेस गरेका छन् ।
२ फागुनमा अमेरिकाले एमसिसी अनुदान स्थगित गर्दै तत्काल कुनै काम नगर्न भनेको थियो । एमसिए नेपालले भने बोलपत्रको म्याद सकिए पनि त्यसको जानकारी सार्वजनिक गरेको थिएन । तर, गत ८ चैतमा एमसिसीले बोलपत्र र कार्यालय सञ्चालनसम्बन्धी काम गर्न स्वीकृति दिएपछि एमसिए नेपालले प्रस्ताव पेस गर्ने कम्पनीको विवरण सार्वजनिक गरेको हो ।
एमसिसीले अनुदानलाई निरन्तरता दिने या नदिने विषयमा २८ अप्रिल अर्थात् १५ वैशाखमा जानकारी दिनेछ । एमसिसीले अनुदान निरन्तरता नदिएमा आफ्नै बजेटमा परियोजना बनाउने नेपाल सरकारको योजना छ ।
न्यूनतम वित्तीय प्रस्ताव २५ करोड डलर, अनुमानित लागतभन्दा पनि कम
यी तीन लटमा प्राप्त न्यूनतम वित्तीय प्रस्तावको योगफल २५ करोड तीन लाख ६५ हजार डलर देखिएको छ, जुन एमसिए नेपालले गरेको अनुमानित लागतभन्दा कम हो । एमसिए नेपालले यी तीन प्रसारणलाइनको संशोधित लागत अनुमान २६ करोड ४२ लाख डलर थियो । तीन लटमा आएको न्यूनतम वित्तीय प्रस्तावहरूको योगफल एक करोड ३९ लाख डलर कम रहेको छ ।
यसअघि न्यूनतम वित्तीय प्रस्ताव अनुमानित लागतभन्दा ६५ प्रतिशत बढी थियो । त्यही कारण टेन्डर प्रक्रिया रद्द गरिएको थियो ।
एमसिसी अनुदानमा चार सय केभीका तीन सय १५ किमि लामा चार प्रसारणलाइन बन्दै छन् । त्यसको निर्माणका लागि पहिलोपटक १२ मंसिर ०७९ देखि ७ जेठ ०८० सम्म ग्लोबल टेन्डर आह्वान गरिएको थियो । त्यसमा कम्पनीहरूले प्रस्ताव गरेको न्यूनतम वित्तीय प्रस्ताव अनुमानित लागतभन्दा ६५ प्रतिशत महँगो टेन्डर रद्द गरिएको थियो ।
त्यसवेला चार प्रसारणलाइनको लागत अनुमान २२ करोड ६ लाख डलर थियो । तर, टेन्डरमा आएको न्यूनतम वित्तीय प्रस्ताव भने ३६ करोड ५९ डलर थियो । त्यसपछि एमसिए नेपालले २६ असोज ०८० मा उक्त टेन्डर रद्द गरेको थियो । त्यसको १५ महिनापछि एमसिए नेपालले पुनः टेन्डर आह्वान गरेको थियो । पहिलाको भन्दा डिजाइन परिवर्तन गरेर टेन्डर आह्वान गरिएको थियो ।
१८ किलोमिटर लामो चार सय केभी क्षमताको ‘न्यु बुटवल–नेपाल÷भारत सीमा’ प्रसारणलाइन बनाउन भने १४ भदौमा भारतको ट्रान्सरेल लाइटिङ लिमिटेडसँग ठेक्का सम्झौता भइसकेको छ । एक करोड २३ लाख ६० हजार डलरमा कम्पनीसँग ठेक्का सम्झौता गरिएको थियो । त्यसपछि बाँकी दुई सय ९७ किमि प्रसारणलाइनको टेन्डर आह्वान गरिएको थियो ।
एमसिसीको ५५ करोड डलर अनुदान र नेपाल सरकारको १९ करोड ७० लाख डलरमा चार सय केभी क्षमताका तीन सय १५ किमि लामो चार प्रसारणलाइन, चार सय केभी क्षमताका तीन सबस्टेसन, पूर्व–पश्चिम राजमार्गको धानखोला–लमही ४० किमि सडकखण्ड र मुग्लिन–नारायणगढ सडकलाई विशेष रूपमा मर्मत गरिँदै छ ।
हालसम्म एक प्रसारणलाइन र तीन सबस्टेसन निर्माणका लागि ठेक्का सम्झौता भइसकेको छ । अहिले ४० किमि लामो धानखोला–लमही खण्डको मर्मत गर्न ठेकेदार कम्पनी छनोट गर्ने प्रक्रियामा छ । यो दुई सय ९७ किमिको प्रसारणलाइन पनि टेन्डर प्रक्रियामै छ । मुग्लिन–नारायणगढ सडक मर्मतका लागि भने ठेक्का आह्वान हुन बाँकी थियो ।
कुन लटमा कसको कति प्रस्ताव ?
लट–१ मा ६ आवेदन, न्यूनतम वित्तीय प्रस्ताव चिनियाँ कम्पनीको
लट–१ अर्थात् एक सय १७ किमि लामो लप्सीफेदी–रातमाटे–न्यु हेटौँडा प्रसारणलाइन बनाउन ६ कम्पनीको प्रस्ताव आएको छ । त्यसमा नेपालका आशिष–बोजलार जेभीले १६ करोड १४ लाख ९४ हजार डलर र सगुन–सलार जेभीले ११ करोड १५ लाख आठ हजार डलरको प्रस्ताव पेस गरेका छन् । यसैगरी, चीनको छिङदाओ हुइचिन्तोङ पावर इक्विपमेन्ट कम्पनीले नौ करोड ५८ लाख ५९ हजार डलर, टर्कीको सारा इनर्जी इन्साट टिकेर एन्ड सारा टेक्नोलोजी जेभीले १४ करोड ९८ लाख १८ हजार डलर र भारतको ट्रान्सेल लाइटिङले १२ करोड १९ लाख ६९ हजार डलरमा काम गर्ने गरी प्रस्ताव पेस गरेको छ । सबैभन्दा कम वित्तीय प्रस्ताव गर्ने चिनियाँ कम्पनी छिङदाओ हुइचिन्तोङ पावर इक्विपमेन्टको प्राविधिक पक्ष पनि बलियो भएमा छनोटमा पर्ने देखिन्छ ।
लट–२ मा पाँच प्रस्ताव, न्यूनतम वित्तीय प्रस्ताव भारतीय कम्पनीको
लट–२ को ९० किमि लामो रातमाटे–न्यु दमौलीमा पाँच कम्पनीको प्रस्ताव आएको छ । त्यसमा टर्कीको सारा इनर्जी इन्साट टिकेर एन्ड सारा टेक्नोलोजीले ११ करोड ५२ लाख ८७ हजार डलरमा काम गर्ने गरी प्रस्ताव पेस गरेका छ । अन्य चार कम्पनी भारतका छन् । ट्रान्सरेल लाइटिङले १० करोड ७३ लाख ३८ हजार डलर, आरएसआइपिएल–एचजिपिटीले आठ करोड ३१ लाख ३२ हजार डलर र एन्जेलिक–स्किपर जेभीले सात करोड ८५ लाख ८० हजार डलरमा काम गर्ने गरी प्रस्ताव पेस गरेका छन् । भारतको केइसी इन्टरनेसनलले यसमा पनि वित्तीय प्रस्तावविनै टेन्डर पेस गरेको छ । त्यसमा आरएसआइपिएल–एचजिपिटीले १.५ प्रतिशत र एन्जेलिक–स्किपर जेभीले ११ लाख डलर छुट दिने प्रस्ताव पनि गरेका छन् । तथ्यांकअनुसार सबैभन्दा कम वित्तीय प्रस्ताव एन्जेलिक–स्किपर जेभीको छुटपछि सात करोड ७४ लाख ८० हजार डलरमा काम गर्ने प्रस्ताव छ ।
लट–३ मा चार प्रस्ताव, न्यूनतम वित्तीय प्रस्ताव नेपाली कम्पनीको
लट–३ अर्थात् ९० किमि लामो न्यु दमौली–न्यु बुटवलमा चार कम्पनीको प्रस्ताव आएको छ । त्यसमा नेपालको वाइबा–सलार जेभीले सात करोड ७० लाख २६ हजार डलरमा काम गर्ने गरी टेन्डर हालेको छ । यसबाहेक तीन कम्पनी भारतका हुन् ।
त्यसमा ट्रान्सरेल लाइटिङले १० करोड १४ लाख २८ हजार र एन्जेलिक–स्किपर जेभीले सात करोड ८९ लाख १६ हजार डलरमा काम गर्ने गरी टेन्डर हालेका छन् । तर, केइसी इन्टरनेसनलले यसमा पनि वित्तीय प्रस्ताव उल्लेख नगरी टेन्डर पेस गरेको देखिन्छ । प्राविधिक रूपमा पास भएमा सबैभन्दा कम प्रस्ताव गर्ने नेपाली कम्पनीले ठेक्का पाउन सक्छ ।
