मार्चमा ५ प्रतिशतले घटे पर्यटक : भारतीय, चिनियाँ र युरोपेली घटे, अमेरिकन र श्रीलंकन बढे

नेपाल घुम्न आउने विदेशी पर्यटक घटेका छन् । अघिल्लो वर्षको मार्चको तुलनामा यस वर्षको मार्चमा पर्यटक आगमन ५ प्रतिशतले घटेको पर्यटन बोर्डको तथ्यांकले देखाएको छ ।

मार्च महिनामा विभिन्न देशबाट एक लाख २१ हजार ६ सय ८७ पर्यटक नेपाल भ्रमणमा आएको पर्यटन बोर्डले जनाएको छ । अघिल्लो वर्ष मार्च २०२४ मा एक लाख २८ हजार एक सय ६७ पर्यटक घुम्न आएका थिए । यस वर्ष भारतीय र युरोपेली देशका पर्यटक घटेपछि पर्यटन क्षेत्र प्रभावित भएको छ । महँगो हवाईभाडा नै नेपाली पर्यटनमा सबैभन्दा ठुलो चुनौती बनेको म्यारियट होटेलका अध्यक्ष शशिकान्त अग्रवालले बताए ।

नेपालमा सबैभन्दा धेरै पर्यटक भारतबाट आउने गर्छन् । तर, मार्चमा भारतबाट २१ हजार चार सय १२ पर्यटक घुम्न आएका छन् । अघिल्लो वर्षको मार्चमा ३० हजार ६ सय ९८ भारतीय नेपाल आएका थिए । दुई ठुला बस दुर्घटना (भारतीय पर्यटक सवार) र अविरल वर्षाले देशभर बाढीपहिरो जाँदा घटेका भारतीय पर्यटक अझै बढ्न सकेका छैनन् । 

भारतीय पर्यटक घट्नुमा पनि चर्को हवाईभाडा, आन्दोलन, सडक दुर्घटनालगायत कारण रहेको म्यारियटका अध्यक्ष अग्रवालको ठम्याइ छ । उनले भने, ‘भारतीय पर्यटकलाई प्लेन चढेर नेपाल घुम्न आउनुभन्दा थाइल्यान्ड जान सस्तो पर्छ, महँगो हवाई यात्रा गरेर किन नेपाल आउँछन् ?’

भारतीय पर्यटक घटेपछि मार्चमा सार्कबाट नेपाल घुम्न आउने पर्यटक १३.४ प्रतिशतले घटेको देखिएको छ । सार्क मुलुकबाट अघिल्लो मार्चमा ४० हजार सात सय २७ पर्यटक नेपाल भित्रिएकोमा यस वर्षको सोही महिनामा ३५ हजार दुई सय ८७ मात्रै पर्यटक भित्रिएका छन् । युरोपेली देशबाट घुम्न आउने पर्यटकको संख्या १०.५ प्रतिशतले घटेको छ । अघिल्लो मार्चमा युरोपबाट २८ हजार सात सय ४७ पर्यटक घुम्न आएकोमा यो मार्चमा २५ हजार सात सय ४२ पर्यटक मात्र आएका छन् । 

बढे अमेरिकी पर्यटक
अरू देशहरूबाट नेपाल आउने पर्यटक घट्दा अमेरिका र मध्यपूर्वका पर्यटक भने बढेका छन् । गत मार्चमा अमेरिकी देशहरूबाट १३ हजार चार सय ५७ पर्यटक नेपाल घुम्न आएकामा यस वर्षको मार्चमा १३ हजार नौ सय सात पर्यटक आएका छन् । संयुक्त राज्य अमेरिका (युएसए)बाट मात्रै ११ हजार ९२ पर्यटक भित्रिएको तथ्यांक छ । मार्चमा मध्यपूर्वी देशबाट दुई हजार सात सय ३२ पर्यटक भित्रिएपछि ७९ प्रतिशतको वृद्धि देखिएको छ । अन्य एसियाली देशहरू, ओसियाना, अफ्रिकनलगायत देशबाट आउने पर्यटक पनि मार्चमा घटेको देखिन्छ । युरोपेली युनियन (इयू)ले नेपालको उड्डयन क्षेत्रलाई कालोसूचीमा राखेका कारण पनि युरोपबाट उल्लेख्य पर्यटक भित्र्याउन नसकिएको पर्यटन व्यवसायी बताउँछन् । सन् २०२४ मा भएका ठुला हवाई दुर्घटना (जहाज र हेलिकोप्टर) र सडक दुर्घटनाले पनि पर्यटक आगमनमा प्रभाव पारेको छ ।

मार्चमा कुन देशबाट कति पर्यटक ?
भारतीय पर्यटक आगमन घटे पनि कुल पर्यटक संख्यामा भारतीयको हिस्सा सबैभन्दा धेरै रहेको छ । मार्चमा भारतबाट २१ हजार चार सय १२ पर्यटक घुम्न आएका छन् । चीनबाट ११ हजार चार सय ४३, युएसएबाट ११ हजार ९२, श्रीलंकाबाट आठ हजार आठ सय ८६, युकेबाट पाँच हजार नौ सय ९५ पर्यटक, थाइल्यान्डबाट चार हजार नौ सय ८६, जर्मनीबाट चार हजार सात सय नौ, अस्ट्रेलियाबाट चार हजार दुई सय २८, म्यानमारबाट तीन हजार सात सय ५४, बंगलादेशबाट तीन हजार पाँच सय ७६ पर्यटक नेपाल घुम्न आएका छन् ।