- वि.सं २o८१ चैत १८ सोमबार
पश्चिम नवलपरासीको बर्दघाट– १४ स्थित सहिद स्मृति सामुदायिक अस्पताल (चौपता अस्पताल)लाई ६ वटा हेमोडायलाइसिस मेसिन हस्तान्तरण गरिएको छ । काभ्रेको धुलिखेलमा एक कार्यक्रमबिच प्रतिनिधिसभा सदस्य विनोद चौधरीको उपस्थितिमा मेसिन बर्दघाट नगरपालिकाका मेयर शम्भुलाल श्रेष्ठलाई हस्तान्तरण गरियो । रोटरी क्लब अफ धुलिखेलको समन्वयमा जर्मन रोटरी भोलिन्टियर डाक्टरका तर्फबाट डाक्टर जोबस्ट इस्बरीले उक्त मेसिन उपलब्ध गराएको हो ।
सांसद चौधरीले डायलाइसिस मेसिन उपलब्ध भएपछि पश्चिम नवलपरासीसहित नजिकका बिरामीले लाभ लिन सक्ने बताए । उनले भने, ‘आज जर्मन रोटरी भोलिन्टियर डाक्टर र रोटरी क्लब अफ धुलिखेलको सहकार्यमा चौपता अस्पताल, बर्दघाटलाई ६ वटा हेमोडायलाइसिस मेसिन हस्तान्तरण गरिएको छ । यसबाट पश्चिम नवलपरासीका मिर्गौला रोगीहरूको उपचारमा महत्वपूर्ण योगदान पुग्नेछ ।’ सांसद चौधरीले अस्पतालका लागि डायलासिस मेसिन र त्यसका लागि आवश्यक जनशक्तिको व्यवस्था गरिदिन स्वास्थ तथा जनसंख्यामन्त्री प्रदीप पौडेललाई आग्रह गर्दै आएका थिए । स्वास्थ्यमन्त्री पौडेलले हेमोडायलाइसिस मेसिन सञ्चालनका लागि आवश्यक पर्ने जनशक्ति तयार गर्न पनि सहयोग गर्ने जनाइसकेका छन् ।
धुलिखेल नगरपालिकाका मेयर अशोक ब्यन्जूले मोफसलका सामुदायिक अस्पतालमा महत्वपूर्ण स्वास्थ्य सामग्री उपलब्ध हुँदा यसबाट नागरिकलाई लाभ हुने विश्वास व्यक्त गरे । यसअघि रोटरी क्लब अफ धुलिखेलले पश्चिम नवलपरासीमा ह्विल चियर प्रदान गर्नुका साथै बर्दघाटको रेयुकाई भवनमा आँखा क्लिनिक पनि सञ्चालनमा सहयोग गरेको थियो । डायलाइसिस मेसिन हस्तान्तरण कार्यक्रममा नगरप्रमुख शम्भुलाल श्रेष्ठ, चौपता अस्पतालका अध्यक्ष डिबी रानासहितका पदाधिकारी पनि उपस्थित थिए ।
