- वि.सं २o८१ चैत ५ मंगलबार
पोखरा अन्तर्राष्ट्रिय विमानस्थलबाट मंगलबारदेखि नियमित व्यावसायिक चार्टर उडान सुरु हुने भएको छ । चीनको सिचुवान एयरलाइन्सले मंगलबारदेखि चीनको छेन्दुबाट पोखरा र पोखराबाट छेन्दु रुटमा साताको एक दिन नियमित व्यावसायिक चार्टर उडान सुरु गर्न लागेको हो ।
नेपाल–चीनबिच कूटनीतिक सम्बन्ध स्थापनाको ७० वर्ष पुगेको अवसरमा पोखरा पर्यटन परिषद्को नेतृत्वमा नेपालस्थित चिनियाँ राजदूतावास र सिचुवान एयरलाइन्ससँगको सहकार्यमा उडान सुरु हुन लागेको हो ।
छेन्दुबाट मंगलबार एक सय २७ यात्रु लिएर पोखरा आउने विमानले पोखराबाट पोखराका मेयर धनराज आचार्यको नेतृत्वमा एक सय २३ यात्रु लिएर छेन्दु जानेछ । बिहान १० बजे चिनियाँ यात्रु लिएर आउने सिचुवानको विमानले १२ बजे पोखराबाट यात्रु लिएर छेन्दु जानेछ । नेपाल आउने र चीन जानेहरूका लागि सात रात आठ दिनको प्याकेज बनाइएको छ ।
