फालिसकेको राजतन्त्र फर्कन सक्दैन : बिजुक्छे

नेपाल मजदुर किसान पार्टीका अध्यक्ष नारायणमान बिजुक्छेले राजतन्त्र फर्कने सम्भावना नरहेको बताएका छन् । बच्चावेलाको लुगा लगाउन नमिलेजस्तै फालिसकेको राजतन्त्र फर्कन नसक्ने उनको भनाइ छ ।

भक्तपुरको व्यासीस्थित वासु माध्यमिक विद्यालयको वार्षिकोत्सव एवं सांस्कृतिक कार्यक्रमलाई सम्बोधन गर्दै अध्यक्ष बिजुक्छेले राजतन्त्रले धनी र सामन्ती वर्गको मात्र हित गर्ने भएकाले श्रमजीवी मजदुर र किसान वर्गले राजाको पछि लाग्नु नहुने सुझावसमेत दिए ।

राजनीतिक दलले राम्रो काम गर्न नसक्दा जनता निराश भएका र राजावादीले जनतालाई भड्काउन खोजेका उनले आरोप लगाए । राजावादीहरू पनि वास्तविक राजावादी नभई राजा आए फाइदा लिन सकिन्छ कि भन्ने अवसरवादीहरू मात्र भएको उनले दाबी गरेका छन् । 

राजनीतिक दलका नेताहरू जनता राजाका पक्षमा फर्केलान् भन्ने त्रासमा रहेको उल्लेख गर्दै उनीहरूले राम्रो काम गरे जनताले राजाबारे सोच्नै नपर्ने स्पष्ट पारे । राजा भएर पनि महेन्द्रले क्रान्तिकारी भूमिसुधार लागू गरेको, उद्योग, कलकारखाना खोलेको चर्चा गर्दै अध्यक्ष बिजुक्छेले पूर्वराजा ज्ञानेन्द्रलाई भने व्यापारीको संज्ञा दिए ।

राजाको प्रत्यक्ष शासनको वेलामा भक्तपुर नगरपालिकाले सल्लाघारीस्थित ९९ रोपनी खाली जग्गा माग्दा तत्कालीन राजा ज्ञानेन्द्रले आफ्ना ज्वाइँमार्फत आधा–आधा खाने प्रस्ताव पठाएको पनि उनले खुलासा गरे । ज्ञानेन्द्रसँग देश विकासको कुनै भिजन नभएको भन्दै अध्यक्ष बिजुक्छेले ज्ञानेन्द्र नाफा–घाटा हेर्ने व्यापारी मात्र भएको जिकिर गरे ।
 

राजाको शासन जनताले हेरिसकेका र फेरि हेर्न आवश्यक नभएको उनको भनाइ छ । विश्व इतिहासमा राजतन्त्रको राम्रो अन्त्य नभएको प्रसंग उल्लेख गर्दै अध्यक्ष बिजुक्छेले  नेपालका पूर्वराजालाई पनि चलखेल नगर्न सुझाव दिएका छन् ।