मुख्य समाचार डिजिटल संस्करण

उदयपुरमा पुस्तक बेच्दै महावीर पुन

पुस्तक विक्रिबाट हालसम्म दश करोडभन्दा बढी रकम संकलन

वीरगन्ज कृषि औजार कारखाना सञ्चालन गर्न डाक्टर महावीर पुन आफैँले लेखेको आत्मकथामा आधारित पुस्तक ‘सम्झना, सपना र अविरल यात्रा’ बिक्री गर्दै उदयपुर आइपुगेका छन् । कृषि औजार कारखाना सञ्चालन गर्न तीन लाख पुस्तक बिक्री गर्ने लक्ष राखेर मेची–महाकाली महाअभियानमा होमिएका पुन मंगलबार दिउँसो उदयपुरको सदरमुकाम गाईघाट आइपुगेका हुन् ।

उनले भने, ‘पश्चिम नेपालको यात्रा सकेर पूर्वी नेपालको यात्राको अभियानमा उदयपुर आइपुगेको छु । उदयपुरको गाईघाटलगायतका क्षेत्रमा दुई दिन पुस्तक बेचेर सप्तरीतर्फ लम्कनेछु ।’ उनका अनुसार उदयपुरमा हालसम्म चार सयभन्दा बढी पुस्तक बिक्री भइसकेका छन् । पुस्तक बेच्नेक्रम जारी रहेको छ ।

उनले गाईघाट वरपर कसैले कार्यक्रम राखेर किताब किन्न चाहेको खण्डमा ९८४१५९२३६१ मा सम्पर्क गरी भेट्न सक्ने जानकारी दिए । पुनको गाईघाट आगमनले स्थानीयवासी र शुभचिन्तकहरूमा उत्साह थपेको छ । स्थानीयहरूले पुस्तक किन्न मात्र नभई उनको अभियानलाई समर्थन जनाउन पनि सक्रियता देखाएका छन् । 

किरण राईले पुनलाई दिए ५० हजार

यसैगरी गाईघाटमा रहेको जेके पुस्तक पसलका सञ्चालक किरण राईले महावीर पुनलाई ५० हजार रकम सहयोग गरेका छन् । पुनले हालसम्म एक लाख ५० हजार पुस्तक बिक्री गरी दश करोडभन्दा बढी पैसा संकलन गरेको जानकारी दिए । 

उनले भने, ‘पुस्तक बिक्री सुरु गरेदेखि हालसम्म एक लाख ५० हजारभन्दा बढी पुस्तक बिक्री भइसकेको छ । हिसाब निकाल्न बाँकी छ । झन्डै १० करोड संकलन भइसकेको छ ।’

कृषि औजार कारखाना सञ्चालन गर्न १५ करोड रुपैयाँ आवश्यक रहेकाले तीन लाख प्रति किताब बेच्दा त्यति नाफा निस्कने उनको भनाइ छ । राष्ट्रिय आविष्कार केन्द्र नामक संस्था खोलेका पुनले नेपालका प्रतिभालाई स्वदेशमा राखेर सहयोग गर्ने र उद्यमी बनाउने लक्ष्य राखेका छन् । 

वर्षौँदेखि बन्द रहेको कारखाना सञ्चालनमा ल्याएर कृषिमा आमूल परिवर्तन गर्न सकिने सपना पुनको छ । कारखाना सञ्चालनमा सरकारले रुचि नदेखाएपछि आफैँले पुस्तक बेचेर भए पनि  सञ्चालनमा ल्याउने अभियानले सार्थकता पाउँदै गएकोमा पुनले खुसी व्यक्त गरे । पुनको एउटा पुस्तकको मूल्य ७५० रुपैयाँ रहेको छ ।