महाकवि देवकोटा स्मृति सम्मानबाट माधव पोख्रेल सम्मानित

महाकवि लक्ष्मीप्रसाद देवकोटा स्मृति साहित्य सम्मान– २०८१ बाट यस वर्ष साहित्यकार माधवबहादुर पोख्रेललाई सम्मान गरिएको छ । साहित्य संगम मकवानपुर र युग प्रकाश क्लब हेटौँडाले संयुक्त रूपमा ११६औँ देवकोटाजयन्तीको अवसर पारेर साहित्यकार पोख्रेललाई सम्मान गरेको हो ।

बिहीबार हेटौँडा- ११ स्थित त्रिभुवन नमुना माविको प्रांगणमा भएको एक साहित्यिक कार्यक्रमबिच पोखरेललाई नगद १० हजार रुपैयाँसहित सम्मानपत्रले सम्मानित गरिएको साहित्य संगम मकवानपुरका अध्यक्ष डिबी बर्तौलाले जानकारी दिए । पोखरेललाई कार्यक्रमका प्रमुख अतिथि हेटौँडा- ११ की वडाध्यक्ष जुना दाहाल, साहित्य संगम मकवानपुरका अध्यक्ष  बर्तौलालगायतले नगदसहित सम्मानपत्र प्रदान गरेका थिए ।

नेपाली साहित्यको उन्नयन र श्रीवृद्धिमा उल्लेखनीय योगदान पुर्‍याएबापत साहित्यकार पोख्रेललाई सम्मान गरिएको संगमका अध्यक्ष डिबी बर्तौलाले जानकारी दिए । मातृभूमि साहित्य समाज मकवानुरका निवर्तमान अध्यक्ष एवं भीम विराग प्रतिष्ठान नेपालका कोषाध्यक्षसमेत रहेका पोख्रेलले नाटक, कविता, गीतलगायत साहित्यका विभिन्न विद्यामा कलम चलाएको अध्यक्ष बर्तौलाले बताए ।

उक्त अवसरमा मातृभूमि साहित्य समाजका पूर्वअध्यक्ष हयग्रिव आचार्य, साहित्य संगम मकवानपुरका पूर्वअध्यक्षहरू निमेश निखिल, श्याम बानियाँ, सुवास खनाल, मकवानपुर उद्योग वाणिज्य संघका महासचिव दीपक उप्रेतीलगायतको उपस्थिति रहेको थियो ।

सम्मान समर्पण कार्यक्रमअघि हेटौँडा- ११ स्थित सहिद स्मारक जाने गेट मेनरोडबाट कार्यक्रमस्थल त्रिभुवन नमुना माविसम्म प्रभातफेरीको आयोजनासमेत गरिएको थियो ।