संविधानले सबैलाई अधिकारसम्पन्न बनाएको छ : प्रधानमन्त्री

प्रधानमन्त्री केपी ओलीले संविधानले सबैलाई अधिकारसम्पन्न बनाएको बताएका छन् ।

संविधान दिवसका अवसरमा आज सामाजिक सञ्जालबाट शुभकामना सन्देश जारी गर्दै प्रधानमन्त्री ओलीले  भने, ‘संविधानले सबैलाई अधिकारसम्पन्न बनाएको छ । सबैखाले विचार, समुदाय, भूगोल, लिंग, जाति र धर्मका भावनालाई यसले संरक्षण गरेको छ । यसको संरक्षण गरेर मात्र हामीले उपभोग गरेका अधिकारको रक्षा हुन सक्छ ।’ सन्देशमा भनिएको छ, ‘जनताले लामो समयसम्म भोगेको निरंकुशता आजको पुस्ताले पनि बिर्सनुहुँदैन । यो स्वतन्त्रता गुमेको दिन कस्तो हुन्छ भन्ने सम्झँदा हाम्रो मस्तिष्कमा समाजलाई निरंकुशताले नियन्त्रण गरेको दुई दशक अगाडिको चित्र आउँछ ।’

दशकौँ लामो संघर्ष र सयौँको बलिदानको फलस्वरूप जनता आफैँले आफ्ना लागि तय गरेको शासन प्रणाली र जनताले चुनेको संविधानसभाले संविधान निर्माण गरेको उल्लेख गरे । ओलीले संविधानले दिएको स्वतन्त्रताको उपभोग गरेर भविष्य सुरक्षित गर्नुपर्ने बताए ।