खेलकुद प्रिन्ट संस्करण

सन्दीप र दीपेन्द्रको टिमलाई पहिलो अंक

क्यानडामा चलिरहेको ग्लोबल टी–२० लिगमा नेपाली क्रिकेटरद्वय अलराउन्डर दीपेन्द्र सिंह ऐरी र लेग स्पिनर सन्दीप लामिछाने पहिलो अंक जोडेका छन् । शनिबार राति भएको खेलमा भेनकुवरले सर्रेे ज्याकवार्ससँग अंक बाँडेको हो ।

भेनकुवरले पहिले ब्याटिङ गर्ने क्रममा ५ ओभरमा १ विकेट गुमाएर २८ रन बनाएपछि वर्षा भयो । त्यसपछि पुनः खेल हुन नसक्दा दुवै टोलीले समान एक अंक बाँडेका हुन् । भेनकुवरमा रहेका दीपेन्द्र र सन्दीपले भने यस खेलमा पहिलो ११ मा स्थान बनाएनन् । दुवैलाई विश्राम दिइएको थियो । पाँचौँ खेलमा एक अंक जोडेको भेनकुवर पुछारमा छ । 

अर्काे खेलमा नेपालका कप्तान रोहितकुमार पौडेल सम्मिलित टोरोन्टो नेसनल्सले मोन्ट्रियल टाइगर्सको खेलमा अत्यधिक वर्षा भएपछि अंक बाँडेको छ । यद्यपि, रोहित बेन्चमा सीमित रहे । वर्षाका कारण खेल ढिला सुरु हुँदा मात्र ६ ओभरको खेलिएको थियो ।

टाइगर्सले टस हारेर पहिले ब्याटिङ गर्दा २ ओभरमा २ विकेट गुमाएर २५ रन बनायो । पुनः वर्षा भएपछि खेल रोकिएको हो । त्यसपछि सुरु हुनैसकेन । त्यसपछि दुवै टोलीले समान एक अंक बाँडेका हुन् । अब, भेनकुवर र टोरोन्टोबीचको खेल हुनेछ ।