- वि.सं २o८१ असार २२ शनिबार
अविरल वर्षाका कारण हिमाली जिल्ला मुगु र हुम्लामा चार दिनदेखि हवाई सेवा अवरुद्ध भएको छ । जसले गर्दा यात्रुहरू मर्कामा परेका छन् । निरन्तर वर्षा हुन थालेपछि मुगु, जुम्ला र हुम्लाका उडान अवरुद्ध भएका छन् । उडान अवरुद्ध हुँदा विभिन्न ठाउँमा जाने यात्रुहरू गन्तब्यमा पुग्न पाएका छैनन्।
निरन्तरको वर्षातले चार दिनदेखि नेपालगन्जबाट हवाई उडान नभएको रारा नागरिक उड्डयन कार्यालयका प्रमुख श्रीकृष्ण रिजालले बताए । उनका अनुसार उडान बन्द भएपछि मुगुदेखि नेपालगन्ज, सुर्खेत, काठमाडौंतर्फ जाने यात्रु र नेपालगन्ज सुर्खेतबाट मुगुतिर आउने यात्रु विमानस्थलमै रोकिनु पर्ने अवस्था उत्पन्न भएको छ ।
आज पनि मौसम बिग्रेका कारण उडान हुने सम्भावना न्यून रहेको उनले बताए । हवाई सेवा अवरुद्ध भएपछि यात्रुहरु जोखिम मोलेर कर्णाली राजमार्गबाट आउजाउ गर्न बाध्य भएका छन् ।
नेपालकै प्रमुख पर्यटकीय क्षेत्र रारा घुम्न आउने पर्यटकहरु रारा विमानस्थलबाट हवाइ यात्रा गर्ने गर्दछन । यो विमानस्थलमा निजी तथा सरकारी स्वामित्वका विमानहरुले दैनिक ३/४ हवाइ उडान गर्दै आएको रारा नागरिक उड्डयन कार्यालय ताल्चले जनाएको छ । यतिबेला भने वर्षाका कारण हवाई सेवा अवरुद्ध हुँदा यात्रुलाई समस्या भएको छ ।
कर्णाली राजमार्ग अवरुद्ध
अविरल बर्षातका कारण कर्णाली राजमार्गमा पनि कालीकोट खण्डको गगने खोला, झाम्ला खोला, सहित विभिन्न स्थानहरुमा लेदो बगेर, पहिरो झरेर सडक अवरुद्ध भएको सडक डिभिजन कार्यालय जुम्लाले जनाएको छ ।
हुम्लामा पनि हवाई सेवा अवरुद्ध
हुम्लामा पनि वर्षाले चार दिनदेखि हवाई सेवा अवरुद्ध भएको छ । खराब मौसमका कारण बुधबार देखि हवाई सेवा अवरुद्ध भएको नागरिक हवाई उड्डयन कार्यालय सिमकोटका प्रमुख महेन्द्रबहादुर सिंहले जानकारी गराए । हवाई सेवा अवरुद्ध भएपछि यात्रु मर्कामा परेका छन् ।
