Skip This
ट्राफिक प्रहरीको इतिहास र विकासक्रमका साथै सडक सुरक्षा र ट्राफिक व्यवस्थापनमा गरिएका प्रयासलाई समेटेर उपत्यका ट्राफिक प्रहरी कार्यालयले ‘ट्राफिक प्रहरी मिरर ०२४’ प्रकाशन गरेको छ । प्रहरी महानिरीक्षक वसन्तबहादुर कुँवरले मिररको बुधबार विमोचन गरेका हुन् ।
कार्यक्रममा महानिरीक्षक कुँवरले मिरर प्रकाशन प्रशंसनीय काम भएको र बढ्दो सहरीकरण र सवारी साधनको वृद्धिसँगै ट्राफिक व्यवस्थापन चुनौतीपूर्ण बन्दै गएको बताए । यस्तै, अख्तियार दुरुपयोग अनुसन्धान आयोगका पूर्वआयुक्त अवकाश प्राप्त प्रहरी अतिरिक्त महानिरीक्षक केशव बरालले विगतमा ट्राफिक प्रहरीले गरेका काम देखाउने ऐनाको रूपमा मिरर प्रकाशन भएको र मिररले ट्राफिक व्यवस्थापनको विगत र वर्तमानलाई स्पष्ट पार्ने बताए ।
कार्यक्रममा काठमाडौं उपत्यका प्रहरी कार्यालय रानीपोखरीका प्रमुख प्रहरी अतिरिक्त महानिरीक्षक दीपक थापाले पहिलोपटक लिखित दस्ताबेजको रूपमा प्रकाशन भएको मिररले २००७ सालदेखि हालसम्म ट्राफिक प्रहरीले गर्दै आएका कार्यलाई समेटेको बताए । यातायात व्यवस्था विभागका महानिर्देशक उद्धवप्रसाद रिजालले ट्राफिक पुलिस मिररले विगतलाई स्मरण गर्न महत्वपूर्ण भूमिका खेल्ने बताए ।
काठमाडौं उपत्यका ट्राफिक कार्यालयका प्रमुख प्रहरी नायव महानिरीक्षक पोषराज पोखरेलले ट्राफिक पुलिसको इतिहासदेखि वर्तमान गतिविधि मिररमा प्रस्ट पारिएको उल्लेख गरे । ट्राफिक प्रहरीको ऐतिहासिक विकासक्रम, ज्ञान, सीप तथा ट्राफिक प्रहरीका क्रियाकलापलाई लोप हुन नदिन मिरर प्रकाशन गरिएको उनको भनाइ छ ।
