समाचार डिजिटल संस्करण

आगलागीमा परी घाइते महिलाको उपचारको क्रममा मृत्यु

 खाना पकाउने क्रममा आगलागीमा परी घाइते भएकी एक महिलाको उपचारको क्रममा मृत्यु भएको छ । मृत्यु हुनेमा मन्थली नगरपालिका–११ गेलुस्थित काउले डाँडागाउँकी ४२ वर्षीया साइलीमाया तामाङ रहेकी छिन् । बिहीबार घरमा खाना पकाउने क्रममा आगो शरिरमा सल्किदा गम्भीर घाइते भएकी साइलीमायाको घटनास्थलवाट उद्धार गरी मन्थली अस्पतालमा उपचारको लागि भर्ना गरिएको थियो । 

आगलागीमा परेकी साइलीमायाको शरिरको धेरै भाग जलेको कारण जिल्लामा उपचार सम्भव नभएपछि थप उपचारको लागि किर्तीपुर अस्पतालमा रिफर गरिएको थियो । उनको उपचारको क्रममा शनिबार बिहान मृत्यु भएको जिल्ला प्रहरी कार्यालय रामेछापका सूचना अधिकारी दिनेश थापाले जानकारी दिए ।

एकहप्ता अघि मन्थली नगरपालिका–९ पुरानागाउँमा पत्कर पोल्ने क्रममा एक वृद्धा पनि आगलागीमा परेकी थिइन । उनको उपचारको क्रममा किर्तीपुर अस्पतालमै  ज्यान गएको थियो । रामेछापमा पछिल्लो समय दैनिक आगलागीका घटनाहरु बढ्दै गएका छन् । आगलागीमा परेर दुईजनाले ज्यान गुमाएका हुन् ।