समाचार डिजिटल संस्करण

आगो निभाउने क्रममा बागलुङ एक जनाको मृत्यु, दुई घाइते

बागलुङको तमानखोला वनमा लागेको डढेलो निभाउने क्रममा जलेर एकजनाको मृत्यु भएको छ । आगलागीमा परेर दुईजना घाइते भएका छन् ।

शुक्रबार दिउँसो आगो निभाउन गएका तमानखोला गाउँपालिका-३ को सिलगुम गाउँका ४८ वर्षीय देवसिंह कामीको मृत्यु भएको हो । उनको घटनास्थलमै मृत्यु भएको जिल्ला प्रहरी कार्यालयका सूचना अधिकारी विजय यादवले जानकारी दिए ।

सोही क्रममा ३१ वर्षीय ज्ञानबहादुर बुढामगर र ३३ वर्षीय प्रेमबहादुर घर्तीमगर घाइते भएका छन् । घटनास्थल सदरमुकामदेखि १ सय २० किमी पश्चिममा पर्छ ।घाइतेको अनुहार, हातखुट्टामा समेत आगोले पोलेको स्थानीयले बताए । दुवै जनाको प्राथमिक स्वास्थ्य केन्द्र बुर्तिवाङमा उपचार भइरहेको छ ।

जंगलको आगो गाउँका घरगोठमा पनि सल्केको थियो । आगोले तमानखोला(२ का रामबहादुर कार्कीको जस्ताले छाएको घर, सूर्यबहादुर सिर्पालीको गोठ जलेर पशुचौपाया समेत क्षति भएको छ । प्रहरीले पशुचौपायाको क्षतिबारे तथ्यांक संकलन गरिरहेको बताएको छ ।

आगोले यहाँका दर्जनौ जंगल नष्ट भएका छन् । यादवले जिल्लाका धेरै स्थानमा आगो लागेको सूचना आएको र सोहीअनुसार निभाउने गरी प्रहरी र स्थानीय बासिन्दा परिचालन भएको बताए ।