- वि.सं २o८१ बैशाख २२ शनिबार
सम्पत्ति स्थानान्तरणको सम्भावना रहेको भन्दै थुनामै राख्ने आदेश
गैरकानुनी सम्पत्ति आर्जनसम्बन्धी भ्रष्टाचार मुद्दामा नेपाल टेलिकमका निलम्बित प्रबन्ध निर्देशक सुनील पौडेललाई विशेष अदालतले थुनामै राखी पुर्पक्ष गर्नुपर्ने आदेश गरेको छ । सम्पत्तिको स्थानान्तरण गर्न सक्ने सम्भावनाका कारण बुधबार विशेष अदालतका सदस्यहरू तेजनारायणसिंह राई, रामबहादुर थापा र रितेन्द्र थापाको इजलासले उनलाई थुनामा पठाएको हो । अदालतको आदेशसँगै पौडेल डिल्लीबजार कारागार चलान भएका छन् ।
गत आइतबार अख्तियार दुरुपयोग अनुसन्धान आयोगले उनीविरुद्ध मुद्दा दायर गरेको थियो, जसको बुधबार थुनछेक आदेश भएको हो । ‘यसमा प्रतिवादीले सम्पत्तिको अभौतिकीकरण र स्थानान्तरण गर्न सक्ने सम्भावना रहेका कारण थुनामै राखी पुर्पक्ष गर्नुपर्ने आदेश भएको छ,’ विशेषका सूचना अधिकारी यज्ञराज रेग्मीले भने । यो मुद्दामा सुनीलका साथै उनका दाइ अनिल पौडेल पनि प्रतिवादी छन् । पौडेलसँग २३ करोड ७५ लाख अवैध सम्पत्ति रहेको अख्तियारको अभियोग छ ।
सिंगापुरको बैंकमा समेत लुकाएको सम्पत्ति फेला पारी आयोगले मुद्दा दायर गरेको थियो । उनी १० माघदेखि अख्तियारको हिरासतमा थिए । सुनील नेसनल पेमेन्ट गेटवे खरिद प्रकरणमा पनि दोषी ठहर भइसकेका छन् । तत्कालीन राष्ट्रिय सूचना प्रविधि केन्द्रका कार्यकारी निर्देशक तथा नेपाल टेलिकमका प्रबन्ध निर्देशक हुँदा अवैध सम्पत्ति आर्जन गरेको अख्तियारको अभियोग छ । विशेषले उनीमाथि गत शुक्रबार मात्र भ्रष्टाचारको कसुर कायम गर्दै सजाय निर्धारणको पेसी तोकेको हो । उनीमाथि २५ वैशाखमा सजाय निर्धारण हुनेछ ।
