- वि.सं २o८१ बैशाख ९ आइतबार
अर्घाखाँचीको धारापानीमा लागेका भीषण आगलागी अझै नियन्त्रणमा आएकाे छैन । शनिबार दिउँसो १ बजेबाट डढेलाे सुरु भएकाे हाे । भूमिकास्थान नगरपालिका– ४ काे कल्लेरीमा आइतबार बिहानसम्म पनि आगलागी भइरहेकाे छ । वनमा लागेको आगो हावाहुरीका कारण शनिबार दिउँसो १ बजेतिर बस्तीमा सल्किएको थियो।
धारापानीको रातामाटा, जाबुनडाँडा, बाजाखर्क, फलामखिल्जीलगायतका गाउँमा लागेको भीषण आगलागीबाट कम्तीमा २२ घरगोठ जलेर नष्ट भएको भूमिकास्थान नगरपालिकाका मेयर झविलाल थापाले जानकारी दिए ।
प्रहरी, दमकल, स्थानीयले रातभर आगो निभाउने प्रयास गरिरहे पनि डढेलो अझै पूर्ण रूपमा नियन्त्रणमा नआएको थापाले बताए । ‘आगलागीबाट मानवीय क्षति नभए पनि घर र गोठ जलेका छन्,’ मेयर थापाले भने, ‘पशुचौपायाको ठूलो नोक्सान भएको छ, यद्यपि क्षतिको पूर्णविवरण अझै आएको छैन ।’
