- वि.सं २o८o चैत ९ शुक्रबार
लामो समयसम्म पार्टी विभाग गठन नहुँदाको असर कांग्रेसले अझै महसुस गर्न सकेन है ?
हुनपर्ने काम समयमै नहुँदा त त्यसको असर देखिने नै भयो । विभाग गठन गरेर पार्टीलाई चलायमान गर्ने विषयमा ढिलाइ भएकै हो । हामीले यसलाई नजरअन्दाज गरेका पनि होइनौँ । अब भने १५ चैतभित्रै हामी जसरी पनि विभाग गठनलाई टुंग्याउने तयारीमा छौँ । यस विषयमा पार्टीमा सघन छलफल भइरहेको छ । अब बस्ने पदाधिकारी बैठकले यो विषय टुंगो लगाउनेछ ।
कांग्रेसलाई केले रोक्यो त समयमै विभागलाई पूर्णता दिन ?
पार्टीका गतिविधि, विकसित राजनीतिक र अन्य घटनाक्रमका कारण पार्टी विभागले पूर्णता पाउन सकेका थिएनन् । विभिन्न कारणले तयारी नपुग्दा लामो समयसम्म हामीले परिणाममा देखिने गरी काम नसकेका हौँ । विभाग गठनबारे हामी निरन्तर छलफलमै थियौँ । छलफलबाट सबै विषयमा सन्तुलन कायम गरेका छौँ । अब नतिजामा देखाउँछौँ ।
विभागको संख्या ४८ बाट बढाउने विषयमा के हुँदै छ ?
१० साउनमा बसेको केन्द्रीय समिति बैठकले गरेको निर्णयअनुसार हामीले ७० विभाग र नामको टुंगो लगाइसकेका छौँ । पुराना विभागसँगको कार्यक्षेत्र मिलानलगायतका काम पनि सबै सकिसकेका छौँ । अब विभागका संयोजक तोक्ने, सदस्य मनोनयन गर्ने र सम्पूर्ण विभागलाई पूर्णता दिने काम मात्र बाँकी छ ।
