प्रमुख प्रतिपक्षी दल कांग्रेसका सांसद प्रदीप पौडेलले राजीनामा दिएर नैतिकता देखाउन गृहमन्त्री रवि लामिछानेलाई सुझाव दिएका छन् ।
प्रतिनिधिसभाको आजको बैठकको आकस्मिक समयमा बोल्दै कांग्रेस सांसद पौडेलले राजीनामा दिएर उदाहरण पेस गर्न भनेका हुन् ।
‘अनुसन्धानको घेराभित्र रहेको व्यक्तिले गृह मन्त्रालयको नेतृत्व गर्दा सहकारीका पीडितले कसरी न्याय पाउन सक्छन् ?’ उनले भने, ‘त्यसैले मेरा मित्र माननीय गृहमन्त्रीज्यूलाई भन्न चाहन्छु, उच्च नैतिकताको आधारमा राजीनामा दिएर उदाहरण प्रस्तुत गर्नूस् ।’
लामिछाने विगतमा अरूलाई प्रश्न गर्ने पेसाबाट राजनीतिमा आएको चर्चा गर्दै उनले भने, ‘अहिले आफूमाथि प्रश्न उठेका वेला प्रश्न बोकेर उहाँ गृहमन्त्री हुनुहुँदैनथ्यो । प्रधानमन्त्रीले प्रश्नले घेरिएको मान्छेलाई गृहमन्त्री बनाउनु हुँदैनथ्यो ।’
सांसद पौडेलले ३१ हजार सहकारीका ७३ लाख बचतकर्ताले सहकारीका सञ्चालकबाट आफ्नो बचत फिर्ताको माग गरिरहेको भन्दै सहकारीको पैसा अपचलनको आरोपमा अनुसन्धानमा रहेका व्यक्तिलाई गृहमन्त्री बनाउँदा पीडितले न्याय पाउन नसक्ने बताए ।