पश्चिम एसिया फुटबल एसाेसिएसन (वाफ) महिला च्याम्पियनसिप २०२४ को आफ्नो दोस्रो खेलमा नेपालले आज इराकको सामना गर्दै छ ।
आमन्त्रित टोलीका रूपमा वाफ महिला च्याम्पियनसिपमा सहभागी नेपालले प्रतियोगिताकोे पहिलो खेलमा सिरियालाई ४–१ गोलअन्तरले पराजित गरेको थियो ।
दोस्रो खेल नेपाली समयअनुसार आज साँझ पौने आठ बजे साउदी अरेबियाको किङ अब्दुल्लाह स्पोर्टस् सिटी रिजर्व स्टेडियममा हुनेछ । आजको खेलमा पनि नेपालले सिरियासँगको खेलमा जस्तै आक्रामक फुटबल खेल्ने तयारी गरेको छ ।
समूह ‘बी’मा रहेको नेपाल पहिलो खेलपछि तीन अंकसहित शीर्ष स्थानमा छ । समूह ‘बी’मै रहेको प्यालेस्टाइनको पहिलो खेलबाट समान तीन अंक भए पनि गोलअन्तरका कारण दोस्रो स्थानमा छ । प्यालेस्टाइनले पहिलो खेलमा इराकलाई ३–० ले पराजित गरेको हो ।
प्यालेस्टाइन र सिरियाबीचको खेल पनि आजै हुनेछ । तर, यी दुईबीचको खेल मध्यरात हुनेछ । समूहका शीर्ष दुई क्लब सेमिफाइनलमा प्रवेश गर्नेछन् । समूह ‘ए’मा भने आयोजक साउदी अरेयिबा, जोर्डन, लेबनान र गुआम छन् । गुआम र नेपाल आमन्त्रित टोलीका रूपमा प्रतियोगितामा सहभागी भएका हुन् ।
नेपाली टोलीको नेतृत्व गोलकिपर एन्जिला तुम्बापो सुब्बाले गर्नेछिन् ।