- वि.सं २o८१ बैशाख २० बिहीबार
चीन सरकारले उत्तरी नाका तातोपानी भन्सार कार्यालयका लागि अत्याधुनिक स्क्यानर मेसिन हस्तान्तरण गरेको छ । नेपालस्थित चिनियाँ राजदूतावासका काउन्सिलर सियू र स्वशासित क्षेत्र तिब्बतको न्यालम जिल्लास्थित अध्यागमनका अधिकारीले भन्सार विभागका उपमहानिर्देशक रमेश अर्याललाई सोमबार तातोपानी भन्सार हाताभित्रै सामग्री हस्तान्तरण गरे ।
चीनले ६२ करोड नेपाली रुपैयाँबराबरका दुईवटा भेहिकल र लगेज स्क्यानरसँगै सामग्री दिएको हो । चीनले फर्निचर, कम्प्युटर, टेलिभिजन, बेड र किचनका सामग्री ०७६ मा नाका खुल्नासाथ चीनले दिएको थियो ।
‘अहिले दुईवटा आधुनिक स्क्यानर मेसिन हस्तान्तरण गरिएको हो,’ तातोपानी भन्सारका सूचना अधिकारी सूर्यप्रसाद काफ्लेले भने । साना–ठूला सबै गाडीको स्क्यान गर्न सक्ने भेहिकल स्क्यानर ट्रकजस्तै गुड्ने खालको छ ।
चिनियाँ नयाँ वर्ष स्प्रिङ फेस्टिभल नजिकिँदै गरेकाले स्क्यानर मेसिन चलाउने प्राविधिक प्रशिक्षण फेब्रुअरी १५ पछि हुने काफ्लेले जानकारी दिए । ‘अत्याधुनिक स्क्यानर मेसिनले मानिसको लगेज र गाडीभित्र रहेका सामानको चेकजाँच गर्न सक्छ ।
स्क्यानर मेसिनले भन्सारमा हुने चोरी–तस्करी र अवैध सामग्री नियन्त्रणमा सहयोग मिल्ने अपेक्षा गरिएको छ,’ तातोपानी भन्सारका प्रमुख भन्सार अधिकृत दयानन्द केसीले भने ।
