- वि.सं २o८o पौष १ आइतबार
व्यायामका लागि नेपालकै जेठो संस्था नेपाल व्यायाम मन्दिर ज्याठाले आफ्नो २३औँ साधारण सभाका अवसरमा विभिन्न खेलकर्मीलाई सम्मान गरेको छ । मन्दिरले बर्सेनि साधारण सभाका अवसरमा विभिन्न व्यक्तित्वलाई सम्मान गर्ने क्रममा शनिबार पत्रकारसहित विभिन्न व्यक्तित्वलाई सम्मान गरेको हो ।
उदय श्रेष्ठ र रत्नलाल मानन्धरलाई लाइफटाइम एचिभमेन्ट अवार्डबाट सम्मानित गरिएको छ । पूर्वअध्यक्ष उदय र सदस्य रत्नलालले नगद ५५ हजार पाँच सय ५५ का साथ प्रशंसापत्र प्राप्त गरे ।
यस्तै, खेलकुद पत्रकार सम्मानबाट रातोपाटीका रोशनसिंह राउत, गोरखापत्रका प्रजित शाक्य, कान्तिपुर टेलिभिजनका प्रदीप लेखी, मेरो फिटनेस प्राइम एचडी टिभीका देवराज पराजुली, काष्ठमण्डप टिभीका रोहित भट्ट र एबिसी टिभीका कविराज बिसीलाई नगद १० हजारसहित सम्मान गरिएको छ ।
यसैगरी साधारण सभाले नारायण प्रधानलाई छैटौँपटकका लागि सर्वसम्मत अध्यक्षमा चयन गरेको छ । वरिष्ठ उपाध्यक्षमा अजय बज्राचार्य, उपाध्यक्षमा नानीकाजी डंगोल र अनिललाल श्रेष्ठ, महासचिवमा सूर्यप्रसाद जोशी, सचिवमा ईश्वर श्रेष्ठ, कोषाध्यक्षमा प्रशान्त सिंह छन् ।
