खैरो हिरोइनसहित एक युवक पक्राउ 

सिराहा प्रहरीले लागुऔषधसहित एक युवकलाई पक्राउ गरेको छ। सिराहाको लहान नगरपालिका- ८ मा रहेको मखन भोग होटेलबाट खैरो हिरोइनसहित एक युवकलाई प्रहरीले पक्राउ गरेको छ ।

लागुऔषध नियन्त्रण ब्युरो शाखा कार्यालय जनकपुरधाम र इलाका प्रहरी कार्यालय लहानको संयुक्त प्रहरी टोलीले माखन भोज होटेलमा रहेका सिराहाको बरियारपट्टी गाउँपालिका– १ बडहरीका ४६ वर्षीय ग्रिसप्रसाद यादवलाई पक्राउ गरेको छ ।

प्रहरीले यादवलाई होटेलमा बसिरहेको अवस्थामा  चेकजाँच गर्दा उनले लगाएको ज्याकेटको बायाँपट्टिको खल्तीबाट प्लास्टिकमा पोको पारी राखिएको प्लास्टिकसहित ५१ ग्राम नाै सय मिलिग्राम (प्लास्टिकबाहेक ४९ ग्राम नाै सय मिलिग्राम) लागूऔषध खैरो हिरोइन बरामद गरेको जिल्ला प्रहरी कार्यालय सिराहाका प्रवक्ता डिएसपी रवीन्द्रराज पाण्डेले बताएका छन्।

प्रहरीले ७प५९७ नम्बरको मोटरसाइकल र मोबाइल पनि बरामद गरेको डिएसपी पाण्डेले बताए । पक्राउ गरिएका यादवलाई थप अनुसन्धान गर्न इलाका प्रहरी कार्यालय लहानको नियन्त्रणमा राखिएको छ । सिराहामा पछिल्लो समय लागुऔषधको रूपमा खैरो हिरोइनको कारोबार अवैध रूपमा बढेको छ ।