- वि.सं २o८o असोज १५ सोमबार
हिजोआज नेल आर्ट गर्ने फेसन छ । नेल आर्टिस्टहरूको संख्या पनि बढ्दो छ । हातमा सीप भए बेरोजगार बस्नुपर्दैन भन्ने सोचका साथ धेरैले यो कला सिकिरहेका छन् । सीप सिकेर विदेश जाने सोचले पनि महिलाहरूले नेल आर्ट सिक्न थालेको पाइन्छ ।
आफ्नो नङलाई कसरी स्वस्थ राख्ने, सुन्दरता कसरी ल्याउने भन्ने चासोले पनि महिलाहरूको रुचि यसमा बढ्दो छ । ए नेल आर्टकी सञ्चालक आशा चित्रकार आत्मनिर्भर बन्न सकिने भएकाले पनि धेरैले नेल आर्टमा भविष्य खोजिरहेको बताउँछिन् । नयाँ पुस्ताले सौन्दर्यका लागि पनि नेल आर्ट सिक्न आएको उनको भनाइ छ । चित्रकार भन्छिन्, ‘हामीकहाँ नेल आर्ट सिकेर विदेश जाने विद्यार्थी धेरै हुनुहुन्छ । कतिपयले नेपालमै पार्लर खोलेर बसेका छन् । नेल आर्ट एउटा कला हो । सिकेर पनि खेर जाँदैन ।’
नेल आर्ट महिलालाई सक्षम बनाउने महत्वपूर्ण सीप रहेको उनी बताउँछिन् । ‘नेल आर्ट सिकेर नेपालमै व्यवसाय पनि गरेका छन् । कतिपय पुरुषले पनि सिकिरहेका छन् । तर, ९९ प्रतिशत महिलाले नै सिकिरहेका हुन्छन् । यसले महिला महिला सशक्तीकरणमा पनि सहयोग पुर्याउँछ । मेकअप र हेयरभन्दा अहिले नेल आर्ट ट्रेन्डिङमा छ,’ उनले भनिन् ।
सौन्दर्यविद् कमला श्रेष्ठ वैदेशिक रोजगारीमा जाने महिलाले नेल आर्ट सिकेर जाँदा सजिलै जागिर पाइने भएकाले यो सीपप्रति आकर्षण बढ्न थालेको बताउँछिन् । उनी भन्छिन्, ‘विदेशमा नेल आर्ट निकै चर्चित छ । यो सीप सिकेर गएपछि हात खाली बस्नुपर्दैन । काम गर्न होस् वा अध्ययनका लागि, यो पार्ट टाइम काम गर्न र तत्कालीन जागिर पाइन्छ । खाडी मुलुकदेखि युरोप अमेरिकामा पनि नेल आर्ट सिकेर गयो भने काम पाइन्छ भन्ने धेरैले सोच्न थालेका छन् ।’ यो सीप सिक्न कुनै शैक्षिक योग्यता जरुरी हुँदैन । शैक्षिक योग्यताविना नै सीप आर्जन गर्न सकिन्छ । रुचि हुने र सिर्जनात्मक क्षमता भएकाले नेल आर्ट सिक्न पाउँछन् ।
नेल आर्टको कोर्स बेसिक, डिप्लोमा, मास्टर्स, स्पेसल र प्याकेज गरी सञ्चालन गरिएको हुन्छ । बेसिक १० दिनमा सिकिन्छ, डिप्लोमा एक महिना लाग्छ । कतिपयलाई पूर्ण रूपमा नसिकेसम्म पनि सिकाइन्छ । मास्टर्सचाहिँ दुई महिनाको कोर्स हुन्छ । विद्यार्थी हरेर पनि सिकाइन्छ । कतिपयलाई तीन महिना पनि लाग्छ । विद्यार्थीदेखि गृहिणीहरूले पनि नेल आर्ट सिकिरहेका छन् ।
ध्यान राखौँ
