जोखिम अझै कायमै
पहिरो खसेपछि अवरुद्ध नारायणगढ–मुग्लिन सडक २८ घन्टापछि सञ्चालनमा आएको छ । चितवनको इच्छाकामना गाउँपालिका– ५ को ३ नम्बर पुलनजिक पहिरो खस्दा बिहीबार दिउँसो १ बजेर २० मिनेटमा अवरुद्ध सडक शुक्रबार साँझ साढे ५ बजे मात्र सञ्चालनमा आएको हो ।
सडक अवरुद्ध हुँदा काठमाडौं भित्रिने र काठमाडौंबाट बाहिरिने सवारीसाधन बीच बाटोमै रोकिँदा यात्रु अलपत्र परेका थिए । पहिरोका कारण १० हजारभन्दा धेरै यातायातका साधन रोकिएको र सुरु भएसँगै गन्तव्यतिर लागेको जिल्ला प्रहरी कार्यालय चितवनका प्रमुख रामेश्वर कार्कीले बताए ।
पहिरो पन्छाएर सडक सञ्चालनमा ल्याइए पनि वर्षा भइरहेकाले फेरि पहिरो खस्ने भय रहेको उनले बताए ।
तस्बिर सौजन्य : भरतपुर सडक डिभिजन कार्यालय