युक्रेनमा आएको बाढीमा ३५ बेपत्ता

दक्षिणी युक्रेनमा आइतबार आएको विनाशकारी बाढीका कारण सात बालबालिकासहित ३५ जना बेपत्ता भएका छन् ।

खेर्सन क्षेत्रको अग्रपंक्तिमा रहेको रुसी नियन्त्रित काखोभका जुन ६ मा बाँध ध्वस्त भएपछि हजारौँ मानिस भाग्न बाध्य भएका थिए ।

युक्रेनले निप्रो नदीमा रहेको बाँध रुसले भत्काएको आरोप लगाएको छ भने मस्कोले किएभले उक्त संरचनामा विस्फाेट गराएको आरोप लगाएको छ ।

युक्रेनका आन्तरिक मामिलामन्त्री इगोर क्लाइमेन्कोले दक्षिणी क्षेत्र खेर्सन र माइकोलाइभका ७७ वटा सहर र गाउँ डुबानमा परेको जानकारी दिए । 

क्लाइमेन्कोका अनुसार खेर्सन क्षेत्रमा सात बालबालिकासहित ३५ जना हराइरहेका छन् । बाढीका कारण खेर्सन क्षेत्रमा पाँचजनाको मृत्यु भएको थियो भने माइकोलाइभ क्षेत्रमा एकजनाको मृत्यु भएको थियो ।

ती दुई क्षेत्रमा रहेका तीन हजार ७०० जनालाई सुरक्षितस्थलमा सारिएको उनले बताए । युक्रेनका अभियोजक जनरल एन्ड्री कोस्टिन र अन्तर्राष्ट्रिय फौजदारी अदालतका प्रतिनिधिले पनि बाढी प्रभावित क्षेत्रको भ्रमण गरेको उनको कार्यालयले जनाएको छ ।

‘चेर्नोबिलपछिको यो सबैभन्दा खराब वातावरणीय विपत्ति हो, त्यसैले हामी युद्ध अपराध मात्र होइन, पर्यावरणीयस्थलको पनि अनुसन्धान गरिरहेका छौँ,’ कोस्टिनले जारी गरेको विज्ञप्तिमा भनिएको छ । 

उनका अनुसार कुल ४५० टन टर्बाइन तेल निप्रो र काला सागरको पानीमा खसेको छ । बाँधमा विस्फोटपछि १७० भन्दा बढी अभियोजकहरूले बाँधमा भएको हस्तक्षेपको अनुसन्धान गरिरहेका छन्। रासस