काठमाडौंको सोह्रखुट्टेस्थित एक छात्रावासमा पाँच दिनअघि विद्यार्थी मृत अवस्थामा फेला परेयता उनी अध्ययनरत विद्यालय बन्द रहेको छ । इटरनल लाइट पब्लिक स्कुल (इलिप्स)मा कक्षा पाँचमा अध्ययनरत १२ वर्षीय बालक मृत फेला परेयता आफन्तहरूले विद्यालय बन्द गराएका हुन् ।
विद्यालयको होस्टेलमा बस्दै आएका धादिङ नेत्रावती डबजोङ गाउँपालिकाका अभिषेक तामाङको शव १६ जेठमा झुन्डिएको अवस्थामा फेला परेको थियो । उक्त दिनदेखि नै आफन्तहरूले छानबिन र कारबाहीको माग राख्दै विद्यालय बन्द गराएका हुन् । बालकको मृत्यु शंकास्पद रहेको भन्दै आफन्तले विद्यालय प्रशासनमाथि कारबाहीको माग राख्दै नाराजुलस र धर्ना दिँदै आएका छन् । उनीहरूको अवरोधका कारण विद्यालय बन्द भएको हो ।
जिल्ला प्रहरी परिसर काठमाडौंका अनुसार आफन्तले बालकको आत्महत्या नभई हत्या भएको दाबी गर्दै आइरहेका छन् । यसबारे थप अनुसन्धान भइरहेको परिसरका प्रवक्ता सीताराम रिजालले जानकारी दिए । उनका अनुसार आक्रोशित बनेका आफन्तहरूले विद्यालय तोडफोडसमेत गरेका छन् । उनीहरूले विद्यालयका प्रधानाध्यापक, सहायक प्रधानाध्यापक, होस्टेलका प्रमुखलगायत विरुद्ध गत शुक्रबार सोह्रखुट्टै वृत्तमा आत्महत्या दुरुत्साहन मुद्दा दर्ता गराएका छन् ।
विद्यालय र मृतकका आफन्तबीच विवाद बढेपछि प्रहरीले विद्यालयका प्रधानाध्यापक, सहायक प्रधानाध्यापक, होस्टेलका प्रमुखलाई नियन्त्रणमा लिएर अनुसन्धान गरिरहेको छ । बालककी आफन्त पूर्णिमा तामाङले शवमा निलडामसमेत रहेकाले आत्महत्या नभई हत्या भएको दाबी गरिन् । उनले विद्यालयकै भर परेर बालकलाई छाडिएकाले यसको सम्पूर्ण जिम्मेवारी विद्यालय र होस्टेलले लिनुपर्ने बताइन् । अभिषेक डेढ वर्षदेखि यस विद्यालयमा पढ्न थालेका थिए ।
