अर्थ डिजिटल संस्करण

कछुवा गतिमा तमोर करिडोर, १८ महिनामा आठ प्रतिशत काम सकियाे

ठेकेदार कम्पनीले ढिलाइ गर्दा नेपाल–चीन सीमाको टिप्तालाबाट भारत जोड्ने सबैभन्दा छोटो दूरीको तमोर करिडोरको काम ज्यादै सुस्त गतिमा अघि बढेको छ । दुई वर्षमा सक्नुपर्ने भए पनि १८ महिनामा केही सेक्टरको काम मुस्किलले ३० प्रतिशत मात्रै भएको छ । कुनै सेक्टरको आठ प्रतिशतमा सीमित छ ।

तमोर करिडोरअन्तर्गत ताप्लेजुङको आठराई–त्रिवेणी– १ निगुरादिन लिम्बुनी पुलबाट हाङदेवासम्मको २० किलोमिटर दूरीको दुई लेनको सडक ग्राभेललगायत स्तरवृद्धिका लागि २२ करोड ८४ लाख रुपैयाँमा हिम्डुङ एन्ड थोकर लामा जेभी कन्स्ट्रक्सनले ठेक्का पाएर काम गरिरहेको छ । 

०७८ कात्तिक ७ गते सम्झाैता गरेको उक्त ठेक्का ०८० असोजसम्ममा सक्नुपर्ने छ । तर, अहिलेसम्म १८ महिनाको अवधिमा आठ प्रतिशत मात्र काम भएको तमोर करिडोर सुभाङखोला दोभान ओलाङचुङगोला सडक आयोजना कार्यालय ताप्लेजुङका प्रमुख अमिन्द्र खड्काले बताए । ठेकेदारहरूको लापरबाहीले समस्या भएको उनको भनाइ छ । समय थप हुनेमा ठेकेदार ढुक्क देखिएकाले काम नगरेर आफूलाई दिक्क बनाएको प्रमुख खड्काले बताए ।

पूर्वीपहाडी जिल्लाहरूको विकाससँग प्रत्यक्ष जोडिएको तमोर करिडोरको अर्को सेक्टर अर्थात् पाँचथरको सुबाङखोलादेखि ताप्लेजुङको आठराई–त्रिवेणी– १ निगुरादिन लिम्बुनीसम्मको २० किलोमिटर सडक रायमाझी सुभम् जेभी कन्स्ट्रक्सनले २३ करोड २३ लाखमा ०७८ कात्तिक ७ गते सम्झाैता गरेको हो । ०८० असोज मसान्तसम्म काम सक्नुपर्ने सम्झाैतामा उल्लेख भए पनि यहाँको प्रगति ३० प्रतिशत मात्र छ । अब सम्झाैता अवधि ६ महिना मात्र बाँकी रहेकाले समयमा काम सकिने सम्भावना नरहेको प्रमुख खड्काले बताए ।

उता, तमोर करिडोरकै हाङदेवा–सिवा सडकको १७ किलोमिटर खण्ड सपना याक्थुङहाङ जेभीले सोही मितिमा ठेक्का सम्झाैता गरेको थियो । २४ करोड ४८ लाखमा ठेक्का सम्झाैता गरी काम गरिरहे पनि यहाँको पनि ३० प्रतिशत काम मात्र सकिएको छ । सम्झौताअनुसार अब ६ महिनामा दुई लेनको बाटो ग्राभेलसहित तयार गरिसक्नुपर्नेछ । तर, सो अवधिमा ५० प्रतिशतसम्म पनि काम सक्ने सम्भावना देखिँदैन । 

करिडोर सञ्चालनमा आएपछि पूर्वीपहाडी जिल्ला र तराईबीचको दूरी धेरै घट्नेछ । करिडोर निर्माणपछि पाँचथरको फिदिमदेखि धरान झन्डै तीन घन्टामा पुग्न सकिन्छ भने ताप्लेजुङदेखि झन्डै पाँच घन्टामा धरान पुग्न सकिन्छ । ताप्लेजुङबाट धरानको दूरी झन्डै एक सय ९० किलोमिटरमा खुम्चिने बताइएको छ । अहिले यहाँका नागरिक इलाम, झापा र मोरङ हुँदै झन्डै तीन सय ५० किलाेमिटर दूरी पार गरेर धरान पुग्ने गरेका छन् ।

तर, भारतको सिमाना विराटनगर रानी भन्सारदेखि चीन जोड्ने सबैभन्दा छोटो तमोर करिडोर निर्माण सुस्तताले स्थानीयलाई मात्र नभई समग्र अर्थतन्त्र र विकासमा असर गर्ने निश्चित छ ।