- वि.सं २o७९ फाल्गुण ३० मंगलबार
अन्तरव्यवस्थापिका संघ (आइपियू)को १४६औँ महासभामा भाग लिन बहराइन पुगेका सभामुख देवराज घिमिरेले नेपाली श्रमिकको अवस्थाबारे जानकारी लिएका छन्।
मनामास्थित नेपाली दूतावासमा मंगलबार बिहान पुगेका सभामुख घिमिरेले राजदूत तीर्थराज वाग्ले, दूतावास अधिकारीलगायतसँग नेपाली श्रमिकको अवस्थाबारे जानकारी लिएका हुन्।
अधिकारीहरूले बहराइनमा नेपाली श्रमिक न्यूनतम तलबमा काम गरिरहेको, राहदानी नवीकरण र भिसा प्रक्रियामा समस्या झेल्नुपरेको जानकारी दिएका थिए।
भेटमा सहभागी सभामुखका प्रमुख स्वकीय सचिव तेजप्रकाश भट्टराईका अनुसार अधिकारीहरूले काठमाडौंमा बहराइनको दूतावास खोल्न सरकारले पहल गर्नुपर्ने धारणासमेत राखेका थिए।
सभामुखले बहराइन भ्रमणका क्रममा नेपाली श्रमिकको तलब वृद्धिलगायतका विषयमा आफ्ना समकक्षीसँग कुरा राखेको जानकारी दिए।
कार्यक्रममा नेताहरू रमेश लेखक, हितराज पाण्डे, इन्दु कडरियालगायत उपस्थित थिए। ६ दिने भ्रमण सकेर सभामुख नेतृत्वको नाै सदस्यीय प्रतिनिधिमण्डल बिहीबार स्वदेश फर्कँदै छ।
