- वि.सं २o७९ पौष १९ मंगलबार
४ मंसिरको प्रदेश तथा प्रतिनिधिसभा निर्वाचनपछिको परिवर्तित अवस्थाले जनता समाजवादी पार्टी र नेकपा एकीकृत समाजवादीलाई नजिक्याएको छ । यी दुई पार्टीबीच पछिल्ला केही दिनदेखि एकताका लागि अनौपचारिक छलफल चलिरहेका छन् ।
यसैबीच, जसपाको आज काठमाडौंमा बसेको राजनीतिक समितिले विचार मिल्ने शक्तिहरूसँग पार्टी एकताका लागि वार्ता समिति बनाएको छ ।
बैठकले नेता राजेन्द्र श्रेष्ठको संयोजकत्वमा वार्ता समिति गठन गरेको प्रवक्ता मनीष सुमनले जानकारी दिए । समितिमा रकम चेम्जोङ र गोविन्द चौधरी सदस्य छन् ।
एकीकृत समाजवादीको काठमाडौंमा जारी पार्टीका विभिन्न कमिटीका बैठकमा पनि विचार मिल्ने पार्टीहरूबीच एकताको चर्चा चलिरहेको छ । पछिल्लो समय एकीकृत समाजवादीका सम्मानित नेता झलनाथ खनाल र जसपाका अध्यक्ष उपेन्द्र यादवबीच केही दिनअघि खनालनिवासमा छलफलसमेत भएको थियो ।
